സിയൂള്‍: കൊറിയ ഓപണ്‍ സൂപ്പര്‍ സീരിസ് ബാഡ്മിന്റണ്‍ ടൂര്‍ണമെന്റില്‍ ഇന്ത്യന്‍ താരങ്ങള്‍ക്ക് തിരിച്ചടി . പുരുഷ വിഭാഗം സിംഗിള്‍സില്‍  പ്രമുഖ താരങ്ങളായ കെ ശ്രീകാന്ത്, പി. കശ്യപ്, എച്.എസ് പ്രാണോയ് എന്നിവരും വനിതാ വിഭാഗത്തില്‍ തന്‍വി ലാഡും പുറത്തായി. എന്നാല്‍ പുരുഷ വിഭാഗത്തില്‍ അജയ് ജയറാമും ബി സായ് പ്രണീതും രണ്ടാം റൗണ്ടില്‍ കടന്നത് ഇന്ത്യക്ക് പ്രതീക്ഷയുണര്‍ത്തിയിട്ടുണ്ട്.
അജയ് ജയറാം കൊറിയയുടെ ജിയോന്‍ യിയോകിനെയാണ് പരാജയപ്പെടുത്തിയത്. സ്‌കോര്‍ 23-21, 21-18. നേരത്തെ മലേഷ്യന്‍ ഓപണില്‍ യിയോകിനോട് അജയ് പരാജയപ്പെട്ടിരുന്നു. ചൈനയുടെ ഹുവാ3ങ് യുക്‌സിയാങാണ് അടുത്ത റൗണ്ടില്‍ അജയിന് എതിരാളി. സായ് പ്രണീത് ചൈനീസ് തായ് പേയുടെ സു ഹെന്‍ ഹാവോയെയാണ് പരാജയപ്പെടുത്തിയത്. സ്‌കോര്‍ 21-13, 12-21, 21-15. കൊറിയയുടെ സോന്‍ വാന്‍ ഹൂവാണ് അടുത്ത റൗണ്ടില്‍ പ്രണീതിന് എതിരാളി.
അതേസമയം ഏറെ പ്രതീക്ഷയുമായെത്തിയ ശ്രീകാന്തിനെ ഹോങ് കോങിന്റെ വോങ് വിങ് കി വിന്‍സെന്റാണ് പരാജയപ്പെടുത്തിയത്. സ്‌കോര്‍ 10-21, 24-22, 17-21. കശ്യപ് ചൈനയുടെ ടിയാന്‍ ഹുവെയോടാണ് തോല്‍വി വഴങ്ങിയത്. സ്‌കോര്‍ 22-20, 10-21, 13-21. പ്രാണോയ് ചൈനീസ് തായ്‌പേയുടെ വാങ് സു വെയോടാണ് പരാജയപ്പെട്ടത്. സ്‌കോര്‍ 23-21, 17-21, 15-21. വനിതാ വിഭാഗത്തില്‍ തന്‍വി ലാഡ് ഡെന്മാര്‍ക്കിന്‍രെ അന്ന തിയ മാഡ്‌സനോടാണ് തോല്‍വി വഴങ്ങിയത്. സ്‌കോര്‍ 18-21, 21-13, 18-21