മ്യൂണിക്ക്: യുവേഫ ചാംപ്യന്‍സ് ലീഗില്‍ വമ്പന്‍മാരായ റയല്‍ മാഡ്രിഡിനെ ബൊറൂസിയ സമനിലയില്‍ കുരുക്കി. എന്നാല്‍ ഇറ്റാലിയന്‍ സീരി എ വമ്പന്‍മാരായ യുവന്റസും പ്രീമിയര്‍ ലീഗ് ജേതാക്കളായ ലെയ്‌സ്റ്റെര്‍ സിറ്റിയും ജയം സ്വന്തമാക്കി.
ജയമുറപ്പിച്ച് കളത്തിലിറങ്ങിയ റയലിനെ ഡോര്‍ട്മുണ്ട്  2-2ന് സമനിലയില്‍ തളയ്ക്കുകയായിരുന്നു. റയലിന്റെ സൂപ്പര്‍ താര ടീമിനെ കൂസാതെ കളിച്ച ഡോര്‍ട്മുണ്ട് അവസാന നിമിഷമാണ് സമനില പിടിച്ചത്. റയലിനായി ക്രിസ്റ്റ്യാനോ റൊണാള്‍ഡോയും റാഫേല്‍ വരാനയും സ്‌കോര്‍ ചെയ്തപ്പോള്‍  ഡോര്‍ട്മുണ്ടിനായി പിയറെ ഔബമേയാങ്, ആന്ദ്രെ ഷൂര്‍ലെ എന്നിവര്‍ ഗോള്‍ നേടി. ജര്‍മന്‍ ബുണ്ടസ് ലിഗയില്‍ തുടര്‍ ജയങ്ങള്‍ നേടാനായതിന്റെ ആത്മവിശ്വാസത്തിലാണ് ഡോര്‍ട്മുണ്ട് സ്വന്തം തട്ടകത്തില്‍ റയലിനെ നേരിടാനിറങ്ങിയത്. എന്നാല്‍ ലാ ലിഗയില്‍ തുടര്‍ച്ചയായി വഴങ്ങിയ രണ്ടു സമനിലകള്‍ റയലിനെ സമ്മര്‍ദത്തിലാക്കിയിരുന്നു. എന്നാല്‍ മത്സരത്തിന്റെ തുടക്കത്തില്‍ തന്നെ മികച്ച നീക്കങ്ങള്‍ പുറത്തെടുത്ത റയല്‍ സമ്മര്‍ദത്തെ അനായാസം മറികടന്നു.
രണ്ടാം മിനുട്ടില്‍ ക്രിസ്റ്റ്യാനോ റൊണാള്‍ഡോയുടെ മികച്ചൊരു ഫ്രീകിക്ക് ഡോര്‍ട്മുണ്ടിന് ഭീഷണിയുയര്‍ത്തിയെങ്കിലും ഗോള്‍ കീപ്പര്‍ റോമന്‍ ബുര്‍ക്കിയുടെ ഇടപെടല്‍ അപകടം ഒഴിവാക്കി.  തൊട്ടുപിന്നാലെ ഡോര്‍ട്മുണ്ടും തിരിച്ചടിച്ചു. ഗോണ്‍സാലോ കാസ്‌ട്രോയുടെ തകര്‍പ്പനൊരു നീക്കം കെയ്‌ലര്‍ നവാസ് സേവ് ചെയ്തു. പിന്നീട്  ഗരത് ബെയ്‌ലിന്റെ മികച്ച നീക്കങ്ങള്‍  റയലിന് ഗോള്‍ നേടിക്കൊടുക്കുമെന്ന് കരുതിയെങ്കിലും ഡോര്‍ട്മുണ്ടിന്റെ പ്രതിരോധം ഗോള്‍ നിഷേധിച്ചു. കരീം ബെന്‍സേമയ്ക്ക് ലഭിച്ച സുവര്‍ണാവസരവും ഗോളാക്കാന്‍ സാധിച്ചില്ല. 17ാം മിനുട്ടില്‍ റയല്‍ അക്കൗണ്ട് തുറന്നു. ജെയിംസ് റോഡിഗ്രസ് നല്‍കിയ പന്തുമായി മുന്നേറിയ ബെയ്ല്‍ ക്രിസ്റ്റ്യാനോയ്ക്ക് മികച്ചൊരു പാസ് നല്‍കി. താരം തകര്‍പ്പനൊരു ഷോട്ടിലൂടെ ലക്ഷ്യം കാണുകയായിരുന്നു.
ഗോള്‍ വഴങ്ങിയതോടെ ഡോര്‍ട്മുണ്ട് പ്രതിരോധത്തിലായെങ്കിലും പതിയെ ടീം മത്സരത്തിലേക്ക് തിരിച്ചെത്തി. ആദ്യ പകുതി അവസാനിക്കാന്‍ മിനുട്ടുകള്‍ മാത്രം ശേഷിക്കെ ഡോര്‍ട്മുണ്ട് സമനില ഗോള്‍ നേടി. റയലിന്റെ പ്രതിരോധത്തിലെ പാളിച്ചകള്‍ മുതലെടുത്ത് ഔബമേയാങ് സ്‌കോര്‍ ഒപ്പമെത്തിക്കുകയായിരുന്നു. തൊട്ടുപിന്നാലെ  തന്നെ ക്രിസ്റ്റ്യാനോ വീണ്ടും ഗോള്‍ നേടിയെങ്കിലും റഫറി ഓഫ്‌സൈഡ് വിളിച്ചു. രണ്ടാം പകുതിയില്‍ റയല്‍ തുടക്കത്തില്‍ തന്നെ ആധിപത്യം പുലര്‍ത്തി.
ബെയ്‌ലിന്റെ തകര്‍പ്പനൊരു ക്രോസില്‍ ബെന്‍സേമ ഗോള്‍ നേടുമെന്ന് ഉറപ്പിച്ചെങ്കിലും മത്യാസ് ജിന്‍ഡറിന്റെ മികച്ച പ്രതിരോധം താരത്തിന് ഗോള്‍ നിഷേധിച്ചു. 68ാം മിനുട്ടില്‍ റയല്‍ രണ്ടാം ഗോള്‍ നേടി. ക്രിസ്റ്റ്യാനോയുടെ തകര്‍പ്പനൊരു ക്രോസില്‍ ബെന്‍സേമ ഷോട്ടുതിര്‍ത്തെങ്കിലും ബാറില്‍ തട്ടി മടങ്ങി. എന്നാല്‍ റീബൗണ്ടില്‍ വരാനെ ലക്ഷ്യം കാണുകയായിരുന്നു.
തിരിച്ചടിക്കാന്‍ ഡോര്‍ട്മുണ്ട് ശ്രമിച്ചെങ്കിലും പലതും ലക്ഷ്യത്തിലെത്തിയില്ല. ഗുരെയ്‌റോയുടെ ഷോട്ട് ഇതിനിടയില്‍ നവാസ് സേവ് ചെയ്തു. റയല്‍ ജയമുറപ്പിച്ച ഘട്ടത്തിലാണ് ഷൂര്‍ലെ ഡോര്‍ട്മുണ്ടിന്റെ സമനില ഗോള്‍ നേടിയത്. ക്രിസ്റ്റ്യാന്‍ പുലിസിച്ചിന്റെ പാസില്‍ നിന്നായിരുന്നു ഗോള്‍.
ഡൈനാമോ സാഗ്രെബിനെ എതിരില്ലാത്ത നാലു ഗോളിനാണ് യുവന്റസ് തകര്‍ത്തത്. മിറാലം ജാനിക്, ഗോണ്‍സാലോ ഹിഗ്വയ്ന്‍, പൗലോ ഡൈബാല, ഡാനി ആല്‍വസ് എന്നിവര്‍ യുവന്റസിനായി സ്‌കോര്‍ ചെയ്തു. മത്സരത്തിന്റെ ഒരു ഘട്ടത്തിലും ഡൈനാമോയ്ക്ക് മികവിലേക്കുയരാനായില്ല. പോര്‍ട്ടോയെ എതിരില്ലാത്ത ഒരു ഗോളിനാണ് ലെയ്‌സ്റ്റെര്‍ പരാജയപ്പെടുത്തിയത്. ഇസ്‌ലാം സ്ലിമാനി ലെയ്‌സ്റ്റെറിന്റെ വിജയഗോള്‍ സ്വന്തമാക്കി.
മറ്റു മത്സരങ്ങളില്‍ ടോട്ടനം എതിരില്ലാത്ത ഒരു ഗോളിന് സി.എസ്.കെ.എ മോസ്‌കോയെയും സെവിയ്യ ഇതേ സ്‌കോറിന് ഒളിംപിക് ലയോണിസിനെയും സ്‌പോര്‍ട്ടിങ് സി.പി എതിരില്ലാത്ത രണ്ടു ഗോളിന് ലെഗിയ വാര്‍സാവയെയും കോബന്‍ഹാവന്‍ എതിരില്ലാത്ത നാലു ഗോളിന് ക്ലബ് ബ്രൂഗിനെയും പരാജയപ്പെടുത്തിയപ്പോള്‍ മൊണാക്കോ(1-1) ബയേര്‍ ലെവര്‍കൂസന്‍ മത്സരം സമനിലയില്‍ കലാശിച്ചു.