കോഴിക്കോട്: പ്രശസ്ത സംഗീതസംവിധായകന്‍ എ.ആര്‍ റഹ്മാനു ആദരമര്‍പ്പിച്ചും കിടപ്പിലായ രോഗികള്‍ക്ക് ചികിത്സാസഹായം ലഭ്യമാക്കുന്നതിനും 'ഒരു ദൈവം തന്ത പൂവെ' എന്ന പേരില്‍ സംഗീതോത്സവം സംഘടിപ്പിക്കുന്നു. ജീനിയസ് മ്യൂസിക് സെലിബ്രേഷനാണ് ഒക്‌ടോബര്‍ മൂന്നിന് വൈകിട്ട് നാലിന് കോഴിക്കോട് ടൗണ്‍ഹാളില്‍ റഹ്മാന്റെ 34 ഗാനങ്ങള്‍ ഉള്‍പ്പെടുത്തി 'സാന്ത്വനസംഗീതം' സംഘടിപ്പിക്കുന്നത്.
പുരുഷന്‍ കടലുണ്ടി എം.എല്‍.എ അധ്യക്ഷനാകും. മേയര്‍ തോട്ടത്തില്‍ രവീന്ദ്രന്‍ ഉദ്ഘാടനം ചെയ്യും. കര്‍ണാട്ടിക് സംഗീതജ്ഞന്‍ ഹരിപ്പാട് കെ.പി.എന്‍ പിള്ള, വിജയ് സുര്‍സെന്‍ എന്നിവര്‍ മുഖ്യാതിഥികളാവും. പി.വി ഗംഗാധരന്‍ ഗുരുപൂജ ഉദ്ഘാടനം ചെയ്യും. അഞ്ച് മണിക്കൂര്‍ നീളുന്ന പരിപാടിയില്‍ പിന്നണി ഗായിക കീര്‍ത്തന ശബരീഷ് റഹ്മാന്റെ ഗാനങ്ങള്‍ ആലപിക്കും. എം. തെയ്യനാശാന്റെ സ്മരണക്കായി ഏര്‍പ്പെടുത്തിയ സംഗീതപുരസ്‌കാരം കര്‍ണാട്ടിക് സംഗീതജ്ഞന്‍ പി.കെ ബാലകൃഷ്ണനും ഗായകശ്രീ പുരസ്‌കാരം ഗായകന്‍ സുനില്‍കുമാറിനും സമ്മാനിക്കും. വാര്‍ത്താസമ്മേളനത്തില്‍ സംഘാടകസമിതി ഭാരവാഹികളായ ശബരീഷ്, രജിനേഷ് കുമാര്‍, സോമന്‍ പങ്കെടുത്തു.