തിരൂരങ്ങാടി: സുരക്ഷാ മാനദണ്ഡങ്ങള്‍ പാലിക്കാതെ ഭീമന്‍കല്ലുകളുമായി പോയ ലോറി നാട്ടുകാര്‍ തടഞ്ഞു. താനൂര്‍ ഫിഷിംഗ് ഹാര്‍ബറിലേക്കു കല്ലുകളുമായി പോകുകയായിരുന്ന കൂറ്റന്‍ ടിപ്പര്‍ ലോറിയാണ് ഇന്നലെ രാവിലെ ഒന്‍പതിനു തൃക്കുളം കരിപ്പറമ്പില്‍ തടഞ്ഞത്. വലിയ കരിങ്കല്ലുകള്‍ കയറ്റി പിന്‍ഭാഗത്തു ലോക്കിനു പകരം ചെറിയ പ്ലാസ്റ്റിക് കയറുകൊണ്ട് വലിച്ചുകെട്ടിയ നിലയിലായിരുന്നു ലോറി.
അപകടസാധ്യത മുന്നില്‍കണ്ട നാട്ടുകാര്‍ ലോറി പിടിച്ചിടുകയായിരുന്നു. തുടര്‍ന്നു പൊലിസും മോട്ടോര്‍ വാഹന വകുപ്പ് അധികൃതരും സ്ഥലത്തെത്തി. അപകടം വരുത്തുന്ന നിലയില്‍ ഓവര്‍ലോഡ് കയറ്റിയതിനാല്‍ വെയിങ് ബ്രിഡ്ജ് നല്‍കുന്ന സ്‌ലിപ്പ് ഹാജരാക്കാന്‍ നിര്‍ദ്ദേശിച്ചു ലോറി കസ്റ്റഡിലെടുക്കുയും ചെയ്തു. താനൂര്‍ ഫിഷിംഗ് ഹാര്‍ബറിനായി ഭീമന്‍ കല്ലുകള്‍ വഹിച്ചു പോകുന്ന ഇത്തരത്തിലുള്ള വലിയ ടിപ്പര്‍ ലോറികള്‍ വലിയ അപകട ഭീഷണിയാണുയര്‍ത്തുന്നത്. യാതൊരു സുരക്ഷാമാനദണ്ഡങ്ങളും പാലിക്കാതെ അമിതമായി ലോഡ് കയറ്റിയാണു ലോറികള്‍ ചീറിപ്പായുന്നത് ഏറെ ജനത്തിരക്കേറിയ ചെമ്മാട്ടങ്ങാടിയിലൂടെയാണ്. സ്‌കൂള്‍ സമയത്തും രാവിലെയും വൈകുന്നേരങ്ങളിലും ടിപ്പര്‍ ലോറികള്‍ സര്‍വിസ് നടത്തുന്നതിനു കര്‍ശന നിയന്ത്രണമുണ്ടെങ്കിലും ഇതൊന്നും ലോറി ഡ്രൈവര്‍മാര്‍ ഗൗനിക്കാറില്ല. അധികൃതരും ഇക്കാര്യത്തില്‍ മൗനം നടിക്കുകയാണ്.