എടപ്പാള്‍: കൃത്യമായി ഭക്ഷണവും ചികിത്സയും ലഭിക്കാതെ മരിച്ച ശോഭനയുടെ മകള്‍ ശ്രുതിയെ മലപ്പുറം ഡി.എംഒയുടെ നേതൃത്വത്തിലുള്ള മെഡിക്കല്‍ സംഘം സന്ദര്‍ശിച്ചു. ഡിഎംഒ ഡോ. വി. ഉമറുല്‍ഫാറൂഖ്, അഡീഷണല്‍ ഡി.എം.ഒ ഡോ. ഇസ്മായില്‍, എടപ്പാള്‍ മെഡിക്കല്‍ ഓഫിസര്‍ ഡോ.ജിബിലി, വട്ടംകുളം മെഡിക്കല്‍ ഓഫിസര്‍ മിര്‍ഫത്ത് ഇബ്രാഹിം, ഹെല്‍ത്ത് ഇന്‍സ്‌പെക്ടര്‍ കെ.രാജീവ് എന്നിവരായിരുന്നു സംഘത്തിലുണ്ടണ്ടായിരുന്നത്.
എടപ്പാള്‍ ഹോസ്പിറ്റലിലെത്തിയ സംഘം ഹോസ്പിറ്റല്‍ എംഡി ഡോ.ഗോപിനാഥന്‍, അഡ്മിനിസ്‌ട്രേറ്റീവ് ഓഫിസര്‍ ആത്മജന്‍ പള്ളിപ്പാട് എന്നിവരുമായി ചര്‍ച്ച നടത്തി. മെഡിക്കല്‍ റിപ്പോര്‍ട്ട് പരിശോധിച്ച സംഘം ശ്രുതിയുടെ ആരോഗ്യ സ്ഥിതി മെച്ചപ്പെടുന്നതായി വിലയിരുത്തി. ചികിത്സയ്ക്കായി ഒരുക്കിയ സൗകര്യങ്ങളിലും മെഡിക്കല്‍ സംഘം പൂര്‍ണ തൃപ്തി രേഖപ്പെടുത്തി.
ആരോഗ്യ സ്ഥിതി മെച്ചപ്പെടുന്ന മുറയ്ക്കു സാമൂഹ്യ നീതിവകുപ്പുമായി ബന്ധപ്പെട്ട് ഒരു കെയര്‍ടേക്കറെ നിയമിക്കാനും ഇതിനായുള്ള കാര്യങ്ങള്‍ പരിശോധിക്കുന്നതിനായി വട്ടംകുളം ഹെല്‍ത്ത് ഇന്‍സ്‌പെക്ടറെ ചുമതലപ്പെടുത്തി. സാമൂഹ്യ നീതിവകുപ്പു കെയര്‍ ടേക്കറെ നല്‍കാന്‍ കഴിയാത്ത പക്ഷം എന്‍.ആര്‍.എച്ച്.എം നേരിട്ട് കെയര്‍ടേക്കറെ കണ്ടെത്തും.