കാളികാവ്: കരുളായി വനമേഖലയില്‍ പൊലിസും മാവോയിസ്റ്റുകളും നേര്‍ക്കുനേരെയുണ്ടായ വെടിവെപ്പിനെത്തുടര്‍ന്നു തമിഴ്‌നാട് ആഭ്യന്തര സുരക്ഷാ വിഭാഗം അതീവ ജാഗ്രതാ നിര്‍ദേശം നല്‍കി. കേരള പൊലിസും നിലമ്പൂര്‍ വനമേഖലയുള്‍പ്പെടെയുള്ള അതിര്‍ത്തി മേഖലയില്‍ കനത്ത സുരക്ഷ ഏര്‍പ്പെടുത്തിയതിനാല്‍ മാവോയിസ്റ്റുകള്‍ ഉള്‍വനത്തിലൂടെ അട്ടപ്പാടിയിലേക്കു കടന്നതായി സൂചന. തിങ്കളാഴ്ച രാത്രിയാണു കരുളായി വനമേഖലയില്‍ വെടിവെപ്പുണ്ടായത്. ചൊവ്വാഴ്ച അഗളി വനത്തില്‍ മാവോയിസ്റ്റുകളെ ആദിവാസികള്‍ കണ്ടതായി വിവരം ഉണ്ട്.
നാലു മാസം മുമ്പ് ഊട്ടി നടുവട്ടം വനമേഖലയില്‍ മാവോയിസ്റ്റ് സാന്നിധ്യം ഉള്ളതായി റിപ്പോര്‍ട്ട് ചെയ്തതൊഴിച്ചാല്‍ തമിഴ്‌നാട് മേഖലയില്‍ മറ്റു സംഭവങ്ങളൊന്നും ഉണ്ടായിട്ടില്ല എന്നാണ് ബന്ധപ്പെട്ട ഉദ്യോഗസ്ഥര്‍ പറയുന്നത്. തുടര്‍ന്നാണ് എടക്കര പൊലിസ് സ്റ്റേഷനു സമീപമുള്ള മുക്കവല വനമേഖലയില്‍ മാവോയിസ്റ്റ് വാര്‍ഷിക ദിനാചരണവും കരുളായി വനമേഖലയില്‍ ഇവര്‍ തമ്പടിക്കുകയും ചെയ്തിട്ടുള്ളത്.
കരുളായി വനമേഖലയിലെ ഉച്ചക്കുളം കോളനിയിലെ ആദിവാസികളുടെ പിന്തുണ നേടിയെടുക്കാനുള്ള ശ്രമമാണു മാവോയിസ്റ്റുകള്‍ നടത്തിവന്നിരുന്നത്. തമിഴ്‌നാടും കര്‍ണാടകയും നടപടി കര്‍ശനമാക്കിയതു ഫലം കണ്ടതായാണു സൂചന. ജൂലൈ മാസത്തില്‍ കേന്ദ്ര ആഭ്യന്തര മന്ത്രാലയത്തിന്റെ ഉപദേഷ്ടാവും മലയാളിയുമായ കെ. വിജയ കുമാര്‍ മുഖ്യമന്ത്രി പിണറായി വിജയനുമായി കൂടിക്കാഴ്ച നടത്തിയിട്ടുണ്ട്. കേരളം മാവോയിസ്റ്റുകളുടെ സുരക്ഷിത താവളമാണെന്നു കൂടിക്കാഴ്ചയില്‍ മുഖ്യമന്ത്രിയെ അറിയിച്ചതായാണു വിവരം. തമിഴ്‌നാടിന്റെയും ആന്ധ്രാപ്രദേശിന്റെയും രഹസ്യാന്വേഷണ ഏജന്‍സികള്‍ ഇതിനെ ബലപ്പെടുത്തുന്ന തെളിവുകള്‍ കേന്ദ്ര ആഭ്യന്തര മന്ത്രാലയത്തിനു നല്‍കിയിട്ടുണ്ട്. നിലവിലെ സാഹചര്യം മുന്‍നിര്‍ത്തി സുരക്ഷ ക്രമീകരണങ്ങള്‍ സംസ്ഥാന ആഭ്യന്തര വിഭാഗം ശക്തമാക്കിയിട്ടുണ്ട്. സംസ്ഥാനത്തു മാവോയിസ്റ്റുകളുടെ മൂന്നു ദളങ്ങളാണു പ്രവര്‍ത്തനം നടത്തുന്നത്. നിലമ്പൂര്‍, ഗൂഡല്ലൂര്‍ വനമേഖലയോടു ചേര്‍ന്നു നാടുകാണി ദളം.