തിരൂരങ്ങാടി: വിരണ്ടോടിയ പോത്തിന്റെ പരാക്രമത്തില്‍ എട്ടു പേര്‍ക്കു പരുക്ക്. കാറും ബൈക്കും തകര്‍ത്തു. കൊടിഞ്ഞി തിരുത്തിറോഡില്‍ ഐ.ഇ.സി സ്‌കൂള്‍ പരിസരത്ത് ഇന്നലെ വൈകുന്നേരമാണു സംഭവം. സ്‌കൂള്‍ വിദ്യാര്‍ഥികളായ കൊടിഞ്ഞി ഫാറൂഖ് നഗര്‍ പരേതനായ നെച്ചിക്കാട്ട് അബ്ദുറഹ്മാന്റെ മകള്‍ നജ്‌ല ബാനുവി(15)നെ കോട്ടക്കല്‍ സ്വകാര്യ ആശുപത്രിയിലും കൊടിഞ്ഞി ഫാറൂഖ് നഗര്‍ കൊടക്കാട്ട് സുലൈമാന്റെ മകള്‍ നമീറ(14)യെ കോട്ടക്കല്‍ മിംസ് ആശുപത്രിയിലും കൊടിഞ്ഞി അല്‍ അമീന്‍ നഗര്‍ വലിയകണ്ടത്ത് അബുലൈസിന്റെ മകള്‍ റിഷാന(14), വലിയകണ്ടത്ത് അബ്ദുസലാമിന്റെ മകള്‍ ജിനാന്‍ (13), വലിയകണ്ടത്ത് അബ്ദുല്‍ ഗഫൂറിന്റെ മകള്‍ അഫ്‌ല (13), കൊടിഞ്ഞി ഫാറൂഖ് നഗര്‍ മഞ്ഞളാം പറമ്പത്ത് ഷാനവാസിന്റെ മകള്‍ റിദ ഫര്‍സീന്‍(13), പൊറ്റാണിക്കല്‍ മുസ്തഫയുടെ മകള്‍ അഫ്‌ന (15), വെള്ളക്കാട്ട് മുസ്തഫയുടെ മകള്‍ സിദാ റഷ (12) എന്നിവരെ തിരൂരങ്ങാടി താലൂക്ക് ആശുപത്രിയിലും പ്രവേശിപ്പിച്ചു.
സ്‌കൂള്‍വിട്ടു വീട്ടിലേക്ക് പോകുകയായിരുന്ന വിദ്യാര്‍ഥികള്‍ക്കിടയിലേക്കാണ് പോത്ത് വിരണ്ടോടിയത്. കുട്ടികള്‍ ചിതറി ഓടുകയായിരുന്നു. താഴെവീണവരെ പോത്ത് ചവിട്ടുകയും കുത്തി പരിക്കേല്‍പ്പിക്കുകയും ചെയ്തു.
ശേഷം റോഡില്‍ നിര്‍ത്തിയിട്ടിയിരുന്ന ഇന്നോവകാര്‍ ഭാഗികമായി തകര്‍ക്കുകയും പരിസരത്തെ ബൈക്ക് ഇടിച്ചു തെറിപ്പിക്കുകയും ചെയ്തു. പിന്നീടു പാടത്തേക്ക് ഓടിയ പോത്തിനെ രണ്ട് മണിക്കൂര്‍ നീണ്ട പരിശ്രമങ്ങള്‍ക്കൊടുവിലാണു പിടിച്ചുകെട്ടിയത്.