മണ്ണാര്‍ക്കാട്: തെങ്കര പഞ്ചായത്തില്‍ ഇടതുമുന്നണി പഞ്ചായത്തംഗം രാജിവെച്ചു. 14ാം വാര്‍ഡ് മെമ്പര്‍ ഉഷ കുന്നുമ്മലാണ് ഇന്നലെ ഉച്ചയോടെ ഗ്രാമപഞ്ചായത്ത് സെക്രട്ടറിക്ക് മുന്‍പാകെ രാജി സമര്‍പ്പിച്ചത്. നിലവില്‍ സി.പി.എമ്മാണ് പഞ്ചായത്ത് ഭരിക്കുന്നത്. ആരോഗ്യ വകുപ്പില്‍ ജോലി കിട്ടിയതിനെ തുടര്‍ന്നാണ് രാജിയെന്നാണ് അറിയുന്നത്.
സി.പി.എം സ്ഥാനാര്‍ഥിയായി മത്സരിച്ച ഉഷ പുഞ്ചക്കോട് വാര്‍ഡില്‍ നിന്ന് 62 വോട്ടുകളുടെ ഭൂരിപക്ഷത്തിലാണ് വിജയിച്ചത്. യു.ഡി.എഫ് സ്ഥാനാര്‍ഥി കോണ്‍ഗ്രസിലെ ആയിഷയായിരുന്നു എതിര്‍ സ്ഥാനാര്‍ഥി. 802 വോട്ടുകള്‍ പോള്‍ ചെയ്തപ്പോള്‍ എല്‍.ഡി.എഫിന് 378 ഉം, യു.ഡി.എഫിന് 316 ഉം, ബി.ജെ.പി 108 വോട്ടുകളും നേടി. ആകെ 17 അംഗ ഭരണ സമിതിയില്‍ എല്‍.ഡി.എഫ് ഒന്‍പത്, യു.ഡി.എഫ് ആറ്, ബി.ജെ.പി ഒന്ന്, സ്വതന്ത്രന്‍ ഒന്ന് എന്നിങ്ങനെയാണ് കക്ഷിനില.