സുല്‍ത്താന്‍ ബത്തേരി: ജില്ലയിലെ പ്രധാന ടൗണുകളിലൊന്നായ ബത്തേരിയിലെ ഗതാഗതക്കുരുക്കിന് പരിഹാരമെന്ന ലക്ഷ്യത്തോടെ സുല്‍ത്താന്‍ ബത്തേരി ബൈപ്പാസ് റോഡ് യാഥാര്‍ഥ്യമാക്കാനുള്ള നടപടികള്‍ പുരോഗമിക്കുന്നു. ബത്തേരി-മാനിക്കുനി എല്‍.ഐ.സി ഓഫിസ് പരിസരത്ത് നിന്നാരംഭിച്ച് തിരുനെല്ലിയില്‍ അവസാനിക്കുന്നതാണ് നിര്‍ദിഷ്ട ബൈപ്പാസ്. സ്ഥലമേറ്റെടുക്കുന്നതുമായി ബന്ധപ്പെട്ട നടപടികളാണ് പി.ഡ.ബ്ല്യു.ഡിയുടെ നേതൃത്വത്തില്‍ പുരോഗമിക്കുന്നത്.
100 കോടി രൂപ ചെലവിലാണ് മുപ്പത് മീറ്റര്‍ വീതിയില്‍ നാല് കിലോമീറ്റര്‍ ദൂരം ബൈപ്പാസ് നിര്‍മിക്കുന്നത്. ബൈപ്പാസിന്റെ വിശദമായ റിപ്പോര്‍ട്ട് തയാറാക്കി സര്‍ക്കാറിന് സമര്‍പ്പിക്കാന്‍ സ്വകാര്യ കമ്പനിയെ സര്‍ക്കാര്‍ എല്‍പ്പിച്ചു കഴിഞ്ഞു. ഇതിനായി 21 ലക്ഷം രൂപയും അനുദിച്ചിട്ടുണ്ട്. ബൈപ്പാസിനുള്ള സ്ഥലം ഏറ്റെടുക്കല്‍ മറ്റ് നടപടിക്രമങ്ങള്‍ അടക്കമാണ് മുന്‍ സര്‍ക്കാര്‍ 100 കേടി രൂപ അനുവദിച്ചത്. എത്രയും പെട്ടന്ന് ബൈപ്പാസ് പൂര്‍ത്തീകരിക്കുന്നതിനുള്ള നടപടിക്രമങ്ങല്‍ പുരോഗമിക്കുകയാണെന്ന് ബത്തേരി എം.എല്‍.എ ഐ.സി ബാലകൃഷ്ണന്‍ അറിച്ചു. ബൈപ്പാസ് പൂര്‍ത്തിയാവുന്നതോടെ ബത്തേരി ടൗണിലെ ഗതാഗതകുരുക്കിന് ശാശ്വത പരിഹാരമാവും.