കൊയിലാണ്ടി: ബൈക്കിലെത്തി മാല കവര്‍ന്ന സംഭവത്തില്‍ പൊലിസ് അന്വേഷണം ഊര്‍ജിതമാക്കി.
കഴിഞ്ഞദിവസം വൈകിട്ട് അഞ്ചോടെയാണ് ബൈക്കിലെത്തിയ രണ്ടു പേര്‍ കൊയിലാണ്ടി ഗവ. ഗേള്‍സ് ഹയര്‍ സെക്കന്‍ഡറി സ്‌കൂള്‍ അധ്യാപിക ലസിതയുടെ കഴുത്തില്‍ നിന്നും അഞ്ചു പവന്‍ തൂക്കം വരുന്ന സ്വര്‍ണമാല കവര്‍ന്നത്. പൊലിസ് സ്റ്റേഷനു നൂറു മീറ്റര്‍ അകലെ നടന്ന സംഭവത്തിന്റെ ദൃശ്യം സ്റ്റേഷനു സമീപം സ്ഥാപിച്ച കാമറയില്‍ ലഭിച്ചതാണ് പ്രതികളെ കുറിച്ചുള്ള വിവരം ലഭിക്കാനിടയായത്.
ദൃശ്യം പരിശോധിച്ചതിനെ തുടര്‍ന്ന് ടീച്ചറും പ്രതികളെ തിരിച്ചറിഞ്ഞതായി കൊയിലാണ്ടി പൊലിസ് പറഞ്ഞു.
പ്രതികളെ ഉടന്‍ പിടികൂടുമെന്നും ഇവര്‍ നിരീക്ഷണത്തിലാണെന്നും പൊലിസ് അറിയിച്ചു.