കോഴിക്കോട്: കല്ലായിപ്പുഴ ജന്മം നല്‍കിയ പാട്ടുകാരനാണ് ഇന്നലെ നിര്യാതനായ ദര്‍ബ മൊയ്തീന്‍ കോയ. അറുപതുകളിലെ കോഴിക്കോടന്‍ പാട്ടനുഭവത്തിന്റെ പ്രതിനിധിയായിരുന്നു അദ്ദേഹം.
1939 നവംബര്‍ 18ന് ഉമ്മര്‍ മൂപ്പന്റെയും തിത്തിബിയുടെയും മകനായി കല്ലായിയില്‍ പിറന്ന മൊയ്തീന്‍കോയയിലെ പാട്ടുകാരനെ രൂപപ്പെടുത്തിയത് കല്ലായിപ്പുഴയോരമാണ്. പട്ടിണിയും പരിവട്ടവും നിറഞ്ഞതായിരുന്നു കുട്ടിക്കാലം. കോഴിക്കോട് പാണ്ടികശാലയിലും പിന്നീട് കല്ലായി മരമില്ലില്‍ തൊഴിലാളിയായും പ്രവര്‍ത്തിച്ചു.
മരമില്ലിന്റെ ഇരമ്പുന്ന ശബ്ദത്തിനിടയില്‍ പാടിപ്പാടിയാണ് ഉച്ചത്തില്‍ ആലാപനം നടത്താനുള്ള ധൈര്യവും ശേഷിയും തനിക്കു കൈവന്നതെന്ന് ദര്‍ബ പറയാറുണ്ട്. പാട്ടുകാരനായ ജേഷ്ഠസഹോദരനില്‍ നിന്നാണ് ഉമര്‍ ഖിസയും ബദര്‍-ഉഹ്ദ് കാവ്യങ്ങളും മോയിന്‍കുട്ടി വൈദ്യരെയും ദര്‍ബ പരിചയപ്പെടുന്നത്.
ഉമ്മമാര്‍ കുട്ടികളെ പാടിയുറക്കുന്ന താരാട്ട് ഇശലുകളും ദര്‍ബയുടെ പാട്ടുജീവിതത്തില്‍ സ്വാധീനിച്ചു. കടായിക്കല്‍ മോയ്തീന്‍ കുട്ടി ഹാജിയുടെ ഖവാലികളും സൂഫി ഗാനങ്ങളും മാപ്പിളപ്പാട്ടുകളും ദര്‍ബയിലെ പാട്ടുകാരനെ പുതിയ നിലയില്‍ വാര്‍ത്തെടുക്കുന്നതിനു സഹായിച്ചു. മാപ്പിളപ്പാട്ടിന്റെ കാല്‍പനികത നിഴലിക്കുന്ന ഇശലുകള്‍ക്കൊപ്പം ഭക്തി തുളുമ്പുന്ന ഗാനങ്ങളും ദര്‍ബ ആലപിച്ചിരുന്നു.
പാട്ടില്‍ മാത്രമല്ല, ജീവിതത്തെ കുറിച്ചുള്ള കാഴ്ചപ്പാടിലും ദര്‍ബ വേറിട്ട വീക്ഷണം പുലര്‍ത്തി. സാധാരണക്കാരന്‍ സ്വന്തം കവിതയും താളക്രമവും കണ്ടെടുത്തതിന്റെ ചരിത്രമാണ് ദര്‍ബയുടേത്.
മാപ്പിളപ്പാട്ടിന്റെ പോയ കാലത്തെ നാഴികക്കല്ലായിത്തീര്‍ന്ന ഒട്ടേറ ഗാനങ്ങളുടെ ശേഖരത്തിന് ഉടമയായിരുന്നു അദ്ദേഹം. പാട്ടിനു പുറമെ ഒരു സഹൃദയ സദസിനെ മുഴുവന്‍ രസം പിടിപ്പിക്കാനുള്ള ചേരുവ മൊയ്തീന്‍കോയയുടെ പ്രത്യേകതയായിരുന്നു.
ഗാനമേളകളിലെ താര പദവിയില്‍ ജീവിതം കെട്ടിയിടാതെ, തന്റെ പാട്ടിന്റെ സ്മൃതിശേഖരത്തെ അനുവാചകരിലേക്ക് പകര്‍ത്താന്‍ അദ്ദേഹം താല്‍പര്യം കാണിച്ചു. ബാബുരാജും അബ്ദുല്‍ ഖാദറും വിന്‍സന്റ് മാഷും സംഗീതജീവിതം നയിച്ച, കോഴിക്കോട്ടെ മാളികപ്പുരകളിലും മെഹ്ഫിലുകളിലും കല്ല്യാണപ്പുരകളിലും ഗാനമേളകളിലും നിത്യസാന്നിധ്യമായിരുന്നു ദര്‍ബ.
പ്രശസ്തിയും പ്രതാപവും ആഗ്രഹിക്കാത്ത ഈ കലാകാരനെത്തേടി ഏതാനും അംഗീകാരങ്ങളും എത്തി. മൊയ്തീന്‍കോയയുടെ പാട്ടുജീവിതം ടാവലേഴ്‌സ് ആര്‍ടിസ്റ്റ്‌സ് കലക്ടീവ് ആണ് അടുത്ത കാലത്ത് പുനരവതരിപ്പിച്ചത്. ഈയിടെ കൊണ്ടോട്ടി വൈദ്യര്‍ സ്മാരകത്തിലും അദ്ദേഹം പാട്ടവതരിപ്പിച്ചിരുന്നു.