കൊണ്ടോട്ടി: ചീക്കോട് പദ്ധതിയുടെ ആദ്യഘട്ടത്തില്‍ തന്നെ കൊണ്ടോട്ടി നഗരസഭയെയും ഉള്‍പ്പെടുത്തണമെന്നു നഗരസഭാ കൗണ്‍സില്‍ യോഗം ആവശ്യപ്പെട്ടു. പദ്ധതിയുടെ പൈപ്പ് ലൈനുകള്‍ സ്ഥാപിക്കാനുള്ള ചുമതല ജലനിധിയെയാണു സര്‍ക്കാര്‍ ഏല്‍പ്പിച്ചിരിക്കുന്നത്.
ജലനിധിക്കു പഞ്ചായത്തുകളില്‍ മാത്രമേ പ്രവൃത്തി ഏറ്റെടുക്കാന്‍ സാധിക്കുകയുള്ളൂ. ഇതോടെ രണ്ടു പഞ്ചായത്തുകള്‍ ചേര്‍ത്തു രൂപീകരിച്ച കൊണ്ടോട്ടി നഗരസഭ ചീക്കോട് പദ്ധതിയുടെ ആദ്യഘട്ടത്തില്‍ ഉള്‍പ്പെടില്ല. ആദ്യഘട്ടത്തില്‍ തന്നെ നഗരസഭയെ പദ്ധതിയില്‍ ഉള്‍പ്പെടുത്തണമെന്നും യോഗം പ്രമേയത്തിലൂടെ സംസ്ഥാന സര്‍ക്കാറിനോട് ആവശ്യപ്പെട്ടു. പ്രധാനമന്ത്രി ആവാസ് യോജന ഭവന പദ്ധതിയില്‍ നഗരസഭയെ ഉള്‍പ്പെടുത്തിയതായി യോഗത്തില്‍ അറിയിച്ചു. ഇതിന്റെ സാധ്യത ഗുണഭോക്തൃ പട്ടിക തയ്യാറാക്കുന്നതിനുള്ള അപേക്ഷഫോറം ഒക്ടോബര്‍ ഒന്നു മുതല്‍ വിതരണം ചെയ്യും.
നഗരസഭാ ഓഫിസ്, കൗണ്‍സിലര്‍മാര്‍, അങ്കണവാടികള്‍ മുഖേന നല്‍കുന്ന ഫോമുകള്‍ ഒക്ടോബര്‍ 20നകം തിരിച്ചേല്‍പ്പിക്കണം. യോഗത്തില്‍ ചെയര്‍മാന്‍ സി.കെ. നാടിക്കുട്ടി അധ്യക്ഷനായി.