കല്‍പ്പറ്റ: ദേശീയോദ്ഗ്രഥന സന്ദേശവും അഴിമതി വിരുദ്ധ പ്രചാരണവുമായി രാജ്യം മുഴുവന്‍ സൈക്കിളില്‍ സഞ്ചരിക്കുന്ന ഉത്തര്‍പ്രദേശ് സ്വദേശിയെ കല്‍പ്പറ്റയില്‍ പൊലിസ് മര്‍ദിച്ചതായി പരാതി.  സൈക്കിളില്‍ ദേശീയ പതാക കെട്ടി എന്നാരോപിച്ച് തന്നെ പൊലിസ് മര്‍ദിക്കുകയായിരുന്നുവെന്ന് യു. പി സ്വദേശിയായ സുദര്‍ശന്‍ പ്രസാദ് വി സുകര്‍മ്മ പറഞ്ഞു.
അഴിമതി വിരുദ്ധ ബില്ലിനായി 2016 മെയ് 18ന് ആയിരുന്നു യാത്ര തുടങ്ങിയത്. രാജ്യത്തെ 370 ജില്ലകളിലൂടെ 52,391 കിലോമീറ്റര്‍ സഞ്ചരിച്ചാണ് സുദര്‍ശന്‍ വയനാട്ടിലെത്തിയത്. വെള്ളിയാഴ്ച രാവിലെ ജില്ലാ കലക്ടറെ സന്ദര്‍ശിച്ച് കല്‍പ്പറ്റ ടൗണിലൂടെ സൈക്കിളില്‍ പോകുമ്പോഴാണ് പൊലിസ് ഇയാളെ തടഞ്ഞുനിര്‍ത്തിയത്. തന്റെ യാത്രക്ക് അനുമതി ഉണ്ടെന്നും ജില്ലാകലക്ടറെ സന്ദര്‍ശിച്ചാണ് കോഴിക്കോട് ജില്ലയിലേക്ക് പോകുന്നതെന്നും സുദര്‍ശന്‍ ഹിന്ദിയില്‍ പൊലിസിനോട് പറഞ്ഞു. എന്നാല്‍  ദേശീയ പതാകയെ അപമാനിച്ചെന്നുപറഞ്ഞ്  സബ് ഇന്‍സ്‌പെക്ടര്‍ ഇയാളെ മര്‍ദിക്കുകയായിരുന്നുവെന്ന് പറയുന്നു.  ദേശീയ പതാക ആദരവോടെ ഉപയോഗിക്കുന്നതില്‍ നിന്ന് സാധാരണ പൗരനെ വിലക്കുന്ന ഒരു നിയമവും നിലവിലില്ലെന്ന് സുദര്‍ശന്‍ പ്രസാദ് പറയുന്നു. പൊലിസിന്റെ നടപടിക്കെതിരേ സുദര്‍ശന്‍ ജില്ലാ കലക്ടര്‍ക്ക് പരാതി നല്‍കി. സംഭവത്തെകുറിച്ച് അന്വേഷിക്കാന്‍ കലക്ടര്‍ പൊലിസ് മേധാവിക്ക് നിര്‍ദേശം നല്‍കിയിട്ടുണ്ട്. ദേശീയ പതാക ഉപയോഗിച്ചതിന്  സുദര്‍ശന്‍ പ്രസാദിനെതിരേ കേസെടുത്തതായി ജില്ലാ പൊലിസ് മേധാവി അറിയിച്ചു.