സെഞ്ചൂറിയന്‍: ആസ്‌ത്രേലിയക്കെതിരായ ഏകദിന പരമ്പരയിലെ ആദ്യ മത്സരത്തില്‍ ദക്ഷിണാഫ്രിക്കക്ക് ആറു വിക്കറ്റിന്റെ തകര്‍പ്പന്‍ ജയം. ആദ്യം ബാറ്റു ചെയ്ത ആസ്‌ത്രേലിയ ഒന്‍പത് വിക്കറ്റ് നഷ്ടത്തില്‍ 294 റണ്‍സെന്ന ഭേദപ്പെട്ട സ്‌കോര്‍ പടുത്തുയര്‍ത്തിയപ്പോള്‍ ദക്ഷിണാഫ്രിക്ക നാലു വിക്കറ്റ് മാത്രം നഷ്ടത്തില്‍ 36.2 ഓവറില്‍ 295 റണ്‍സെടുത്തു വിജയിക്കുകയായിരുന്നു.
ഓപണര്‍ ക്വിന്റന്‍ ഡി കോക്കിന്റെ ഉജ്ജ്വല സെഞ്ച്വറിയാണ് ദക്ഷിണാഫ്രിക്കന്‍ വിജയം അനായാസമാക്കിയത്. 113 പന്തുകള്‍ നേരിട്ട് 11 സിക്‌സും 16 ഫോറും അടിച്ചുകൂട്ടി 178റണ്‍സാണ് ഡി കോക്ക് വാരിയത്. സഹ ഓപണ്‍ റോസ്സോ 45 പന്തില്‍ 63 റണ്‍സെടുത്ത് കോക്കിനു മികച്ച പിന്തുണ നല്‍കി. ഇരുവരും ആദ്യ വിക്കറ്റില്‍ 145 റണ്‍സ് കൂട്ടിച്ചേര്‍ത്തു. റോസ്സോ പുറത്തായ ശേഷം കോക്ക് ഏതാണ്ട് ഒറ്റയ്ക്കു തന്നെ ടീമിനെ വിജയത്തോടടുപ്പിച്ചു. വിജയത്തിലേക്ക് 15 റണ്‍സ് മാത്രമുള്ളപ്പോള്‍ ഡി കോക്ക് വീണു. ഓസീസിനായി ബോളണ്ട് മൂന്നു വിക്കറ്റുകളെടുത്തു.
നേരത്തെ ടോസ് നഷ്ടപ്പെട്ട് ബാറ്റിങിനിറങ്ങിയ ആസ്‌ത്രേലിയക്കായി ജോര്‍ജ് ബെയ്‌ലി (74), ഹാസ്റ്റിങ്‌സ് (51), വാര്‍ണര്‍ (40), ഫിഞ്ച് (33), മാര്‍ഷ് (31) എന്നിവര്‍ മികച്ച പ്രകടനം നടത്തി. ദക്ഷിണാഫ്രിക്കക്കായി ഫെലുക്വായി നാലു വിക്കറ്റുകളും സ്റ്റെയിന്‍ രണ്ടു വിക്കറ്റുകളും വീഴ്ത്തി.
ആസ്‌ത്രേലിയയുടെ ദക്ഷിണാഫ്രിക്കന്‍ പര്യടനത്തിന്റെ ഭാഗമായി അഞ്ചു മത്സരങ്ങളാണ് പരമ്പരയിലുള്ളത്.