കോഴിക്കോട്: മെഡിക്കല്‍ കോളജ് പരിസരത്തെ മൊബൈല്‍ ഷോപ്പില്‍ നിന്ന് മൊബൈല്‍ ഫോണ്‍ മോഷ്ടിച്ച യുവാവ് പൊലിസ് പിടിയിലായി. തിരുവനന്തപുരം നെടുമങ്ങാട് സ്വദേശിയും താമരശ്ശേരി കരുവട്ടിച്ചാലില്‍ താമസക്കാരനുമായ സുലൈമാനെ(39)യാണ് മെഡിക്കല്‍ കോളജ് പൊലിസ് അറസ്റ്റ് ചെയ്തത്.
എസ്.ഐ എന്‍. സുബൈര്‍, സി.പി.ഒമാരായ മോഹനന്‍, ജയചന്ദ്രന്‍ എന്നിവര്‍ ചേര്‍ന്നു ഇന്നലെ രാവിലെ മെഡിക്കല്‍ കോളജ് പരിസരത്തു നിന്നാണ് സുലൈമാനെ പിടികൂടിയത്. കഴിഞ്ഞ 22ന് മെഡിക്കല്‍ കോളജ് പരിസരത്തെ സനാ ടവറില്‍ പ്രവര്‍ത്തിക്കുന്ന മൊബൈല്‍ ഷോപ്പിലെത്തെിയ ഇയാള്‍ ജീവനക്കാരിയെ കബളിപ്പിച്ച് ഫോണുമായി മുങ്ങുകയായിരുന്നു. 6,000 രൂപയുടെ മൊബൈല്‍ ഫോണാണു നഷ്ടപ്പെട്ടത്.
ഇയാളില്‍ നിന്ന് ഫോണ്‍ കണ്ടെടുത്തു. ഇതിനു പുറമെ, പുതിയ ബസ് സ്റ്റാന്‍ഡ് പരിസരത്തുനിന്നു മോഷ്ടിച്ച മൊബൈല്‍ ഫോണും ഇയാളില്‍നിന്നു ലഭിച്ചിട്ടുണ്ട്. കുന്ദമംഗലം പൊലിസ് സ്റ്റേഷനിലും മലപ്പുറത്തും ഇയാള്‍ക്കെതിരേ കേസുണ്ടെന്ന് പൊലിസ് പറഞ്ഞു.