കണ്ണൂര്‍: ഗാന്ധിജിയുടെ ലളിതജീവിതവും ത്യാഗനിര്‍ഭരമായ പൊതുജീവിതവും അടുത്തറിയുന്നതിനായി കണ്ണൂര്‍ കോളജ് ഓഫ് കോമഴ്‌സില്‍ സംഘടിപ്പിച്ച ഫോട്ടോപ്രദര്‍ശനം ശ്രദ്ധേയമായി.  പാലാ കെ.എം മാത്യു ഫൗണ്ടേഷനും കോളജ് ഓഫ് കോമേഴ്‌സും ചേര്‍ന്നാണ് പരിപാടി സംഘടിപ്പിച്ചത്. മഹാത്മജിയുടെ ഏഴുവയസു മുതല്‍ അന്ത്യനിമിഷം വരെയുള്ള 220ഓളം ഫോട്ടോകളാണ് പ്രദര്‍ശത്തിലുണ്ടായിരുന്നത്.
ഗാന്ധിജി ജനിച്ച വീട്, മാതാപാതാക്കള്‍, ചെറുപ്പകാലംതൊട്ട് നിയമവിദ്യാര്‍ഥിയും ആഫ്രിക്കയില്‍ ബാരിസ്റ്ററുമൊക്കെയായ കാലഘട്ടത്തിലെ ഫോട്ടോകള്‍, ഉപ്പുസത്യാഗ്രഹം, ക്വിറ്റ് ഇന്ത്യാ സമരപ്ര്യാപനം, ദണ്ഡിയാത്ര തുടങ്ങി ദേശാഭിമാനത്തെ പ്രോജ്വലിപ്പിക്കുന്ന ചരിത്രപ്രധാനമുള്ള നിമിഷങ്ങളൂടെ വിവിധ ദൃശ്യങ്ങളും ഈ ഫോട്ടോ പ്രദര്‍ശനത്തില്‍ ഉള്‍പ്പെടുത്തിയിരുന്നു. ജവര്‍ഹര്‍ലാല്‍ നെഹറു, ചാര്‍ളിചാപ്ലിന്‍, ഇന്ദിരാഗാന്ധി, സുബാഷ് ചന്ദ്രബോസ്, മൗലാന ആസാദ്, സര്‍ദാര്‍ പട്ടേല്‍, മൗണ്ട് ബാറ്റണ്‍ പ്രഭു, രവീന്ദ്രനാഥ ടാഗോര്‍ എന്നിവര്‍ക്കൊപ്പമുള്ള ഫോട്ടോകളും പ്രദര്‍ശനത്തിലുണ്ട്. കോളജ് ഓഡിറ്റോറിയത്തില്‍ ഗാന്ധിജയന്തി വാരാഘോഷവും ഗാന്ധിദര്‍ശന്‍ ഫോട്ടോപ്രദര്‍ശനവും മന്ത്രി രാമചന്ദ്രന്‍ ഉദ്ഘാടനം ചെയ്തു. കോളജ് ചെയര്‍മാന്‍ സി അനില്‍കുമാര്‍ അധ്യക്ഷനായി. പ്രൊഫ. ബി മുഹമ്മദ് അഹമ്മദ് മുഖ്യപ്രഭാഷണം നടത്തി. സുകുമാരന്‍ മൂലേക്കാട്ട്, ഡോ.വിജയമ്മ നായര്‍, ഡോ. ഭാഗ്യലക്ഷ്മി, സോമു മാത്യു സംസാരിച്ചു.