കൊച്ചി: ജില്ല ഭരണകൂടത്തിന്റെയും വിവിധ വകുപ്പുകളുടെയും ആഭിമുഖ്യത്തില്‍ ഗാന്ധിജയന്തി വാരാഘോഷത്തിന് ഇന്ന് തുടക്കമാവും. ഇന്‍ഫര്‍മേഷന്‍ ആന്റ് പബ്ലിക്ക് റിലേഷന്‍സ്, വിദ്യാഭ്യാസം, ആരോഗ്യം, എക്‌സൈസ്, പൊലിസ്, തദ്ദേശ സ്വയംഭരണം എന്നീ വകുപ്പുകളും വിവിധ സംഘടനകളും ചേര്‍ന്നാണ് വാരാചരണം നടത്തുന്നത്. ഇന്‍ഫര്‍മേഷന്‍ പബ്ലിക്ക് റിലേഷന്‍സ് വകുപ്പിന്റെ ഗാന്ധിജയന്തി ദിനാചരണം ആലുവ ഗവ. ബോയ്‌സ് ഹയര്‍ സെക്കണ്ടറി സ്‌കൂളില്‍ രാവിലെ 9.30ന് ജസ്റ്റിസ് കെ. സുകുമാരന്‍ ഉദ്ഘാടനം ചെയ്യും. സ്‌കൂള്‍ ലൈബ്രറികള്‍ക്ക് നല്‍കാനുള്ള ഗാന്ധി സാഹിത്യകൃതികള്‍ ജില്ലാ ലൈബ്രറി കൗണ്‍സില്‍ ഭാരവാഹികള്‍ക്ക് കൈമാറിയാണ് ദിനാചരണത്തിന്റെ ഉദ്ഘാടനം. വിവിധ മത്സരങ്ങളും ഇതോടൊപ്പം നടക്കും.
ജില്ലാതല ശുചിത്വ വാരാചരണത്തിന്റെ ഉദ്ഘാടനം കാക്കനാട് സിവില്‍ സ്റ്റേഷനില്‍ രാവിലെ പത്തിന് കലക്ടര്‍ കെ. മുഹമ്മദ് വൈ. സഫീറുള്ള നിര്‍വഹിക്കും. തിരുവാങ്കുളം മുനിസിപ്പല്‍ സോണല്‍ ഓഫീസ് ഹാളില്‍ ഇന്ന് ഉച്ചയ്ക്ക് രണ്ടിന് അനുസ്മരണ സമ്മേളനത്തില്‍ ഐ.എന്‍.എസ് വെണ്ടുരുത്തി കമാന്‍ഡിങ് ഓഫീസര്‍ കമ്മഡോര്‍ ജി. പ്രകാശ് പ്രസംഗിക്കും. നായരമ്പലം കൊടുങ്ങാശ്ശേരിയില്‍ മഹാത്മ റസിഡന്‍സ് അസോസിയേഷന്റെ ആഭിമുഖ്യത്തില്‍ നടത്തുന്ന അനുസ്മരണസമ്മേളനത്തില്‍ ജോയി നായരമ്പലം പ്രസംഗിക്കും.
ആകാശവാണിയും ജില്ലാ ഇന്‍ഫര്‍മേഷന്‍ ഓഫീസും സംയുക്തമായി സംഘടിപ്പിക്കുന്ന ഗാന്ധി ക്വിസ് മത്സരം നാളെ കലക്ടറേറ്റിലെ സ്പാര്‍ക്ക് ഹാളില്‍ നടക്കും. വൈകിട്ട് മൂന്നിന് കാക്കനാട് യൂത്ത് ഹോസ്റ്റലില്‍ നെഹ്‌റു യുവകേന്ദ്രയുടെ ആഭിമുഖ്യത്തില്‍ നടത്തുന്ന ഗാന്ധി അനുസ്മരണത്തില്‍ പി.എം. വര്‍ഗീസ് പ്രഭാഷണം നടത്തും. തിരുവാങ്കുളം തുടര്‍വിദ്യാകേന്ദ്രത്തില്‍ ദേശീയ ഹിന്ദി പക്ഷാചരണത്തിന്റെ ഭാഗമായി സെമിനാര്‍, കയ്യെഴുത്ത് മത്സരം, ഹിന്ദി ഗാനാലാപനം എന്നിവ നടക്കും.