പൂക്കോട്ടുംപാടം: കൂറ്റമ്പാറയില്‍ കോഴി ഫാം കത്തി നശിച്ചു. വെള്ളിയാഴ്ച രാത്രി പത്തോടെയാണ് സംഭവം. ചെറുമുറ്റിക്കോട് പുതിയറ കുഞ്ഞോയിയുടെ കോഴി ഫാമാണ് കത്തി നശിച്ചത്. 12 ദിവസം പ്രായമായ 17,000 ത്തോളം കോഴിക്കുഞ്ഞുങ്ങളാണ് ഇവിടെയുണ്ടായിരുന്നത്. സമീപ വാസികള്‍ തീ പടരുന്നത് കണ്ട് ഉടമസ്ഥനെ വിളിച്ചറിയിക്കുകയായിരുന്നു. തുടര്‍ന്ന് നാട്ടുകാരും അഗ്‌നിശമന സേനയും ചേര്‍ന്നാണ് തീയണച്ചത്. അപ്പോഴേക്കും ഷെഡും കോഴികളും കോഴിത്തീറ്റയും അനുബന്ധ സാമഗ്രികളും പൂര്‍ണമായും കത്തി നശിച്ചിരുന്നു.
ഒരു വര്‍ഷം മുന്‍പാണ് കുഞ്ഞോയി ബാങ്കു വായ്പയെടുത്ത് കോഴിക്കൃഷി ആരംഭിച്ചത്. ഇതിനായി 2,000 അടി വിസ്തീര്‍ണത്തില്‍ വിശാലമായ ഫാമും നിര്‍മിച്ചു. ഈ ഫാമാണ് കത്തിനശിച്ചത്.