കിഴിശ്ശേരി: പൊതുജനങ്ങളുടെ ദുരിതങ്ങള്‍ക്ക് പുല്ലുവില കല്‍പിച്ച് കിഴിശ്ശേരി തവനൂര്‍ റോഡിനോട് അധികൃതരുടെ അവഗണന തുടരുന്നു. ഒരുവര്‍ഷത്തോളമായി യാത്രക്കാര്‍ അനുഭവിക്കുന്ന പ്രയാസം പരിഹരിക്കാന്‍ ജനപ്രതിനിധികളും ഉദ്യോഗസ്ഥരും തയാറാവുന്നില്ല. നൂറുകണക്കിന് വാഹനങ്ങളും ആയിരക്കണക്കിന് യാത്രക്കാരുമാണ് നിത്യവും ഇതിലൂടെ ദുരിതയാത്ര അനുഭവിക്കുന്നത്.
കിഴിശ്ശേരി തവനൂര്‍ റൂട്ടില്‍ കിഴിശ്ശേരി ടൗണ്‍ മുതല്‍ റോഡ് തകര്‍ന്നിരിക്കുകയാണ്. കിഴിശ്ശേരി സ്‌റ്റേഡിയം ബസാറില്‍ ക്ഷേത്രത്തിനു സമീപം റോഡ് പൂര്‍ണമായും തകര്‍ന്നിട്ടുണ്ട്. ഇതുമൂലം കാല്‍നടയാത്രപോലും അസാധ്യമായിരിക്കുകയാണ്.  റോഡ് പൊട്ടിപ്പൊളിഞ്  കുഴികളാല്‍ നിറഞ്ഞിരിക്കുകയാണ്. ഇതുമൂലം ടാക്‌സി വാഹനങ്ങള്‍ ഈ റോഡിലൂടെ വരാന്‍ മടിക്കുകയാണ്. കിഴിശ്ശേരിയില്‍ നിന്ന് മെഡിക്കല്‍ കോളജിലേക്കുള്ള എളുപ്പ വഴി ആയതിനാല്‍  ചെറുതും വലുതുമായ അനേകം വാഹനങ്ങള്‍ ഈ റോഡിനെയാണ് ആശ്രയിക്കുന്നത്. റോഡ് ഗതാഗതയോഗ്യമാക്കണമെന്ന് ആവശ്യപ്പെട്ട് നാട്ടുകാര്‍ സംഘടിച്ചപ്പോള്‍ ക്വാറി വേസ്റ്റ് ഇട്ട് പരിഹരിക്കാനാണ് അധികൃതര്‍ ശ്രമിച്ചത്. പല തവണ  റോഡ് നന്നാക്കണമെന്ന് അധികൃതരുടെ ശ്രദ്ധയില്‍പ്പെടുത്തിയിട്ടും നടപടിയൊന്നും സ്വീകരിക്കാത്തതില്‍ നാട്ടുകാര്‍ പ്രതിഷേധത്തിലാണ്.