അരീക്കോട്: ലോക വയോജന ദിനത്തില്‍ മണ്ഡലത്തിലെ പ്രായം കൂടിയെ ആളെ ആദരിച്ച് പി.കെ ബഷീര്‍ എം.എല്‍.എ. 106 വയസുകാരിയായ എടവണ്ണ ചെരുമണ്ണയിലെ പൂവ്വന്‍കാവില്‍ കദീജക്കുട്ടി ഉമ്മയെയാണ് വീട്ടിലെത്തി എം.എല്‍.എ  പൊന്നാട അണിയിച്ച് ആദരിച്ചത്.
എടവണ്ണ ജി.എം.എല്‍.പി സ്‌കൂളിലെ ആദ്യകാല വിദ്യാര്‍ഥിനിയാണ് കദീജക്കുട്ടി ഉമ്മ.  സ്‌കൂളിലെ ഹെഡ്മാസ്റ്റര്‍  ആയിരുന്ന അലവി മാസ്റ്റര്‍ സഹോദരനാണ്.  പഴയകാല മര വ്യാപാരിയായ പരേതനായ കിളിടുക്കി അലിയാണ് ഭര്‍ത്താവ്.  മക്കളും, പേരക്കുട്ടികളുമായി അഞ്ച് തലമുറയിലെ 156 പേര്‍ അടങ്ങുന്ന  കുടുംബത്തിലെ തലമുതിര്‍ന്ന അംഗമാണ് കദീജക്കുട്ടി ഉമ്മ.