മണ്ണഞ്ചേരി: അടിവാരംതോടിന്റെ ശോച്യാവസ്ഥയ്ക്ക് പരിഹാരം കാണണം എന്നാവശ്യപ്പെട്ട് നാട്ടുകാരുമായി ചേര്‍ന്ന് എ.ഐ.വൈ.എഫ് ബഹുജനപ്രക്ഷോഭത്തിനൊരുങ്ങുന്നു.സമരത്തിന്റെ ആദ്യപടിയെന്നോണം മണ്ണഞ്ചേരി ജംങ്ഷനില്‍ ഒപ്പുശേഖരണംനടത്തി.കഴിഞ്ഞ ദിവസം ഈ തോടിന്റെ ദയനീയാവസ്ഥയെക്കുറിച്ച് സുപ്രഭാതം റിപ്പോര്‍ട്ടുചെയ്തിരുന്നു.
 ഒരുകാലത്ത് ജലഗതാഗതത്തിനായി ഉപയോഗിച്ചിരുന്ന മണ്ണഞ്ചേരിയിലെ അടിവാരംതോടിന്റെ സ്ഥിതി ഇന്ന് പരമദയനീയമാണ്. കൈയ്യേറ്റംമൂലം തോടിന്റെ വീതി പലയിടത്തും പകുതിയില്‍ താഴെമാത്രമായി ചുരുങ്ങി. മാലിന്യം നിറഞ്ഞതിനാല്‍ ഇതിന്റെ അരുകിലൂടെയുള്ള യാത്രയും ദുസ്സഹമായിതീര്‍ന്നു.
കക്കൂസ്മാലിന്യം,അറവുമാലിന്യം,പ്ലാസ്റ്റിക്ക്മാലിന്യം എന്നിവയുടെ വാഹിനിയാണ് ഇപ്പോള്‍ ഈ ജലശ്രോതസ്. അടിവാരം പാലത്തിലും പഞ്ചായത്ത് ഓഫീസിന് പടിഞ്ഞാറുഭാഗത്തെ കലുങ്കിലും വാഹനങ്ങളില്‍ എത്തിച്ചാണ് കക്കൂസ്മാലിന്യം തോട്ടിലേക്ക് ഒഴുക്കുന്നത്. നഗരത്തില്‍ മാലിന്യനിക്ഷേപം കര്‍ശനമായി നിരോധിച്ചതോടെയാണ് ഈ തോട്ടിലേക്ക് അറവുമാലിന്യങ്ങള്‍ വന്നുതുടങ്ങിയതെന്ന് നാട്ടുകാര്‍ പറയുന്നു.
മണ്ണഞ്ചേരി ഗ്രാമപഞ്ചായത്ത് അടിയന്തിരമായി  തോടിന്റെ സംരക്ഷണം ഏറ്റെടുക്കണമെന്ന് സി.പി.ഐയും ആവശ്യപ്പെട്ടു. ഭീമഹര്‍ജ്ജിക്കായി സംഘടിപ്പിച്ച എ.ഐ.വൈ.എഫിന്റെ ഒപ്പുശേഖരണക്യാമ്പയിന്‍ ഉദ്ഘാടനം നടത്തി. വരുംദിവസങ്ങളില്‍ അധികൃതരുടെ ശ്രദ്ധക്ഷണിക്കുന്ന സമരങ്ങളിലേക്ക് നീങ്ങാനാണ് എ.ഐ.വൈ.എഫ് തീരുമാനമെന്ന് നേതാക്കള്‍ അറിയിച്ചു.