മലമ്പുഴ: മലമ്പുഴയില്‍ നിര്‍മിക്കുന്ന ജില്ലാ ജയിലിന്റെ പണി പൂര്‍ത്തിയാകാന്‍ ഇനിയും മാസങ്ങ വേണ്ടിവരും. ഫണ്ട് മുടങ്ങിയതാണ് പണി നീളാന്‍കാരണം. 11.52 കോടി രൂപയുടെ പദ്ധതിയില്‍ ഘട്ടംഘട്ടമായാണ് പണം അനുവദിക്കുന്നത്. അഡ്മിനിസ്‌ട്രേറ്റീവ് ബ്ലോക്കിന്റെ പണി ഏതാണ്ട് പൂര്‍ത്തിയായി. തടവുകാരെ പാര്‍പ്പിക്കുന്ന കെട്ടിടത്തിന്റെ മുകള്‍ നില പൂര്‍ത്തിയാകാനുണ്ട്. മലമ്പുഴയില്‍ മന്തക്കാട് ജലസേചന വകുപ്പിന്റെ പത്തേക്കര്‍ സ്ഥലത്താണ് ജില്ലാജയില്‍ പണിയുന്നത്. എട്ടേക്കറില്‍ ജയില്‍ സമുച്ചയം രണ്ടേക്കറില്‍ ജീവനക്കാരുടെ താമസത്തിനുള്ള കെട്ടിടങ്ങളും മറ്റും നിര്‍മിക്കാനാണ് പദ്ധതി.
ചുറ്റുമതിലിന്റെയും അതിനുചുറ്റുമുള്ള റിങ് റോഡിന്റെയും നിര്‍മാണം നടന്നുവരികയാണ്. ആധുനികരീതിയല്‍ നിര്‍മിക്കുന്ന ജില്ലാ ജയിലില്‍ തൊഴില്‍കേന്ദ്രം, പ്രാര്‍ഥനാമന്ദിരം, സമ്മേളന ഹാള്‍, 400 പേര്‍ക്കുള്ള ഭക്ഷണശാല, ചപ്പാത്തിനിര്‍മാണ യൂനിറ്റ് എന്നിങ്ങനെയുള്ള സൗകര്യങ്ങളുണ്ടാവും. 300 പേരെ പാര്‍പ്പിക്കാന്‍ സൗകര്യമുള്ളതാണ് പുതിയ ജയില്‍ കെട്ടിടം. പാലക്കാട് സബ്ജയിലിലെ തടവുകാരെ പാര്‍പ്പിക്കുന്നതിനാണ് പുതിയ ജയില്‍ നിര്‍മിക്കുന്നത്.
2015 മാര്‍ച്ചിലാണ് നിര്‍മാണമാരംഭിച്ചത്. നഗരത്തില്‍ ടിപ്പുവിന്റെ കോട്ടയ്ക്കുള്ളിലാണ് സബ് ജയില്‍ പ്രവര്‍ത്തിക്കുന്നത്. അസൗകര്യങ്ങളുടെ നടുക്കാണ് ജയില്‍ നില്‍ക്കുന്നത്. പുരാവസ്തുവകുപ്പിന്റെ അധീനതയിലാണ് പാലക്കാട് കോട്ട. ഇവിടെ അറ്റകുറ്റപ്പണിയൊന്നും അനുവദിക്കാത്തതിനാല്‍ നൂറ്റാണ്ടുകള്‍ പഴക്കമുള്ള കെട്ടിടങ്ങള്‍  മോശം അവസ്ഥയിലാണ്. മറ്റ് സര്‍ക്കാര്‍ കെട്ടിടങ്ങള്‍ക്കൊപ്പമാണ് കനത്ത് സുരക്ഷ ആവശ്യമുള്ള ജയിലും പ്രവര്‍ത്തിക്കുന്നത്. തടവുകാരുടെ അടുക്കളപോലും ജയിലിന് പുറത്താണുള്ളത്.
ആകെ 24 സെല്ലുണ്ട്. നാല് സ്ത്രീകള്‍ക്കും 32 പുരുഷന്‍മാര്‍ക്കും താമസ സൗകര്യമുള്ള ജയിലില്‍ എപ്പോഴും പത്തോളം സ്ത്രീ തടവുകാരും 125 ലധികം പുരുഷ തടവുകാരുമുണ്ടാകും.