കോഴിക്കോട്: തൃശൂര്‍ പൂരത്തിന് പുലിവേഷം കെട്ടിയ വനിതകളെ കോഴിക്കോട് നഗരത്തില്‍ അപമാനിക്കാന്‍ ശ്രമിച്ചതായി പരാതി. എ.എസ്.ഐ വിനയയെയും രണ്ട് സുഹൃത്തുകളെയുമാണ് ബൈക്കുകളിലെത്തിയ നാലംഗസംഘം അപമാനിക്കാന്‍ ശ്രമിച്ചത്.
കോഴിക്കോട്ട് നടക്കുന്ന പരിപാടിയില്‍ പങ്കെടുക്കാനായി ഇന്നലെ പുലര്‍ച്ചെ രണ്ടിന് റെയിവേ സ്റ്റേഷനില്‍ ഇറങ്ങിയ വിനയയും സുഹൃത്തുക്കളും ലിങ്ക് റോഡില്‍ നിന്നു  ആനിഹാള്‍ റോഡിലൂടെ നടന്നുപോകുമ്പോഴാണ് ബൈക്കിലെത്തിയ സംഘം പിന്തുടര്‍ന്ന് അപമാനിക്കാന്‍ ശ്രമിച്ചത്. ബൈക്കില്‍ എത്തിയവര്‍ കുറച്ചുസമയം വട്ടംചുറ്റിയപ്പോള്‍ തങ്ങളുടെ എതിര്‍പ്പിനെ തുടര്‍ന്ന് തിരിച്ചുപോവുകയായിരുന്നു. അതേസമയം 100ല്‍ വിളിച്ച് പൊലിസിനെ അറിയിച്ചെങ്കിലും സഹായിക്കാന്‍ അവര്‍ എത്തിയില്ലെന്ന് വിനയ പറഞ്ഞു. സ്ത്രീകള്‍ക്ക് എല്ലാ മേഖലയിലും സ്വാതന്ത്ര്യവും സമത്വവും നല്‍കുന്ന കോഴിക്കോട് നിന്ന് ഇതുപോലെ ഒരു അനുഭവമുണ്ടായത് വളരെയധികം ഖേദകരമാണെന്നും പൊലിസിന്റെ രാത്രി പട്രോളിങ് കൂടുതല്‍ കാര്യക്ഷമമാക്കണമെന്നും വിനയ പറഞ്ഞു. സംഭവവുമായി ബന്ധപ്പെട്ട് പൊലിസില്‍ പരാതി നല്‍കുമെന്നും അവര്‍ വ്യക്തമാക്കി.