പാലക്കാട്:പറമ്പിക്കുളം ആളിയാര്‍ കരാര്‍ പ്രകാരം കേരളത്തിന് നല്‍കാന്‍ വെള്ളം ഇല്ലെന്ന് പറഞ്ഞ് കര്‍ഷകരെ വഞ്ചിക്കുന്ന തമിഴ്‌നാട് പറമ്പിക്കുളം ഡാമുകളിലെ വെള്ളം ഉപയോഗിച്ച്  അഞ്ചു ജില്ലകളില്‍ നെല്‍കൃഷി നടത്തുന്നു.
അലിയാര്‍ ഡാമിന്റെ വൃഷ്ടി പ്രദേശങ്ങളില്‍ മഴകുറവാണെന്ന് പ്രചരിപ്പിച്ചാണ് കേരളത്തിന് വെള്ളം നല്‍കാതിരിക്കുന്നത്. യഥാസമയം വെള്ളം കിട്ടാത്തതിനാല്‍ ചിറ്റൂര്‍ മേഖലയില്‍ 10,000ഏക്കറോളം സ്ഥലത്തു ഒന്നാം വിള ഉണങ്ങി നശിച്ചു. ഇപ്പോള്‍ രണ്ടാം വിള ഇറക്കേണ്ട സമയമാണ്.
സെപ്റ്റംബര്‍ അവസാനം വരെ കേരളത്തിന് കരാര്‍ പ്രകാരം700 ദശലക്ഷം ഘനഅടി വെള്ളം നല്‍കണം. സെപ്റ്റംബര്‍ 30വരെ 400ഘന അടിയില്‍ താഴെ വെള്ളമാണ് വിട്ടത്.
ഇതാണ് കൃഷി ഉണങ്ങാന്‍ കാരണം. ഈ മാസം ആദ്യ പകുതിയില്‍ 700 ഘന അടി വെള്ളം നല്‍കണം. ആളിയാര്‍ ഡാമില്‍ വെള്ളം ഇല്ലെന്നാണ് കഴിഞ്ഞ ദിവസം തമിഴ്‌നാട് ഉദ്യോഗസ്ഥര്‍ പറഞ്ഞത്. എന്നാല്‍ ആളിയാര്‍ വെള്ളം ഉപയോഗിച്ച്  കോയമ്പത്തൂര്‍, തിരുപ്പൂര്‍, മധുര, ദിണ്ടിക്കല്‍ ജില്ലകളിലായി1,00,000എക്കറോളം പ്രദേശത്ത് വര്‍ഷത്തില്‍ മൂന്നുതവണ നെല്‍കൃഷി ചെയ്തു വരുന്നുണ്ട്.
ഇത്തവണ മഴ ഇല്ലാതായതോടെ പാലക്കാട്ടെ ജലസംഭരണികളിലെല്ലാം വെള്ളം കുറഞ്ഞു . കുടിവെള്ളത്തിന് മാത്രമുള്ള വെള്ളമേ ഉള്ളുവെന്നാണ് അധികൃതര്‍ പറയുന്നത്. 3.8 ടി. എം.സി ശേഷിയുള്ള ആളിയാറില്‍ 0.38 ടി. എം.സി വെള്ളമേ ഉള്ളൂവെന്നാണ് പറയുന്നത്.
 ഈ പശ്ചാത്തലത്തില്‍ കേരളത്തില്‍ രണ്ടാം വിള ഇറക്കാന്‍ പറ്റാത്ത അവസ്ഥയുണ്ട്. കൃഷി വകുപ്പ് രണ്ടാംവിള ഇറക്കരുതെന്ന നിലപാടില്‍ നില്‍ക്കുകയാണ്.
ജലസേചന വകുപ്പാണെങ്കില്‍, തമിഴ്‌നാട് നല്‍കുന്ന കണക്ക് വാങ്ങി സര്‍ക്കാരിനെ ബോധിപ്പിച്ച് തടിതപ്പുകയാണ്.