ന്യൂഡല്‍ഹി: ഉത്തരാഖണ്ഡില്‍ വിശ്വാസ വോട്ടെടുപ്പ് നടത്താന്‍ സുപ്രിംകോടതി ഉത്തരവ്. ഈ മാസം 10 ന് വിശ്വാസവോട്ടെടുപ്പ് നടത്തണം. ചൊവ്വാഴ്ച്ച രാവിലെ 11 മണി മുതല്‍ 1 മണി വരെയാണ് സമയം.അയോഗ്യരാക്കപ്പെട്ട 9 വിമത എം.എല്‍.എമാര്‍ക്കും വോട്ടെടുപ്പില്‍ പങ്കെടുക്കാന്‍ കഴിയില്ലെന്നും കോടതി പറഞ്ഞു. ഫലം മുദ്ര വെച്ച കവറില്‍ ബുധനാഴ്ച്ച സുപ്രിംകോടതിയില്‍ സമര്‍പ്പിക്കണം. വോട്ടെടുപ്പ് സമാധാനപരമായി നടത്തേണ്ടത് ചീഫ് സെക്രട്ടറിയുടേയും ഡി.ജി.പിയുടേയും ചുമതലയെന്നും സുപ്രിംകോടതി. വോട്ടെടുപ്പിന്റെ മുഴുവന്‍ ദൃശ്യങ്ങളും റെക്കോര്‍ഡ് ചെയ്യണമെന്നും കോടതി പറഞ്ഞു. ഉത്തരാഖണ്ഡില്‍ ഏര്‍പ്പെടുത്തിയ രാഷ്ട്രപതി ഭരണം റദ്ദാക്കിയ ഹൈക്കോടതി ഉത്തരവിനെതിരെ കേന്ദ്ര സര്‍ക്കാര്‍ സുപ്രിം കോടതിയില്‍ നല്‍കിയ അപ്പീല്‍ പരിഗണിക്കവേ വിശ്വാസ വോട്ടെടുപ്പ് നടത്തുന്നതിനെക്കുറിച്ച് കോടതി കേന്ദ്ര സര്‍ക്കാരിനോട് അഭിപ്രായം തേടിയിരുന്നു. വിശ്വാസ വോട്ടെടുപ്പിന് തയ്യാറാണെന്ന് കേന്ദ്രം സുപ്രിംകോടതിയില്‍ അറിയിച്ചതിന് പിന്നാലെയാണ് വോട്ടെടുപ്പ് നടത്താന്‍ കോടതി ഉത്തരവിട്ടത്.