തുറവൂര്‍ (ആലപ്പുഴ): ജനശതാബ്ദി എക്‌സ്പ്രസ് കടത്തിവിടാനായി ഏറനാട് എക്‌സ്പ്രസ് പിടിച്ചിട്ട റെയില്‍വേ അധികൃതരുടെ നടപടിയില്‍ പ്രതിഷേധിച്ച് ഏറനാട് എക്‌സ്പ്രസിലെ യാത്രക്കാര്‍ പാളത്തില്‍ കുത്തിയിരുന്നു പ്രതിഷേധിച്ചു. ഇതോടെ ഇത് വഴിയുള്ള ട്രെയിനുകളെല്ലാം മണിക്കൂറുകളോളം വൈകി.
  പാളത്തില്‍ അറ്റകുറ്റപ്പണികള്‍ നടക്കുന്നതിനാല്‍ ഇന്നലെ ഒന്നര മണിക്കൂര്‍ വൈകിയാണ് ഏറനാട് എക്‌സ്പ്രസ് എത്തിയത്. ഇതുകൂടാതെ  ജനശതാബ്ദി കടന്നുപോകാനായി ഏറനാട് ഏറെനേരം തുറവൂരില്‍ തടഞ്ഞിട്ടതാണ് യാത്രക്കാരെ രോഷാകുലരാക്കിയത്.തുടര്‍ന്ന് പാളത്തില്‍ കുത്തിയിരുന്നു പ്രതിഷേധിച്ച യാത്രക്കാര്‍ ജനശതാബ്ദി കടത്തിവിടാന്‍ സമ്മതിച്ചില്ല.
  ആലപ്പുഴ പാസഞ്ചര്‍ ട്രെയിനും യാത്രക്കാര്‍ തടഞ്ഞിട്ടു. ക്ഷുഭിതരായ യാത്രക്കാര്‍ സ്റ്റേഷന്‍ മാസ്റ്ററുമായി സംസാരിച്ചപ്പോള്‍ ആലപ്പുഴയില്‍ നിന്നുള്ള നിര്‍ദേശാനുസരണമാണ് തീവണ്ടി പിടിച്ചിട്ടതെന്ന് വ്യക്തമാക്കി.
ഇതുവഴിയുള്ള എല്ലാ തീവണ്ടി സര്‍വിസുകളും സ്തംഭിച്ചതോടെ കുത്തിയതോട് എസ്.ഐ എ.എല്‍ അഭിലാഷിന്റെ നേതൃത്വത്തിലുള്ള വന്‍പൊലിസ് സംഘം സ്ഥലത്തെത്തി സമരക്കാരുമായി ചര്‍ച്ച നടത്തി.
 ഏറനാട് എക്‌സ്പ്രസ് സ്ഥിരമായി പിടിച്ചിടുന്ന രീതി അവസാനിപ്പിക്കണമെന്ന് സമരക്കാര്‍ ആവശ്യപ്പെട്ടു. വിവരം റെയില്‍ ഉദ്യോഗസ്ഥന്മാരെ അറിയിച്ച് ആവശ്യമായ നടപടികള്‍ സ്വീകരിക്കാമെന്ന ഉറപ്പ് സമരക്കാര്‍ക്ക് സ്റ്റേഷന്‍മാസ്റ്ററും എസ്.ഐ അഭിലാഷും നല്‍കിയതോടെയാണ് യാത്രക്കാര്‍ സമരത്തില്‍ നിന്നും പിന്മാറിയത്. ട്രെയിനുകള്‍ യാത്രതുടരാന്‍ വൈകിയതോടെ തുറവൂര്‍ റെയില്‍വേ സ്റ്റേഷന്റെ വടക്ക്‌വശത്തെ തഴുപ്പ് ഗെയ്റ്റും തെക്ക് ഭാഗത്തെ തിരുമല ഗെയ്റ്റും മണിക്കൂറോളം അടഞ്ഞുകിടന്നതുമൂലം വാഹന ഗതാഗതവും തടസപ്പെട്ടു.
റെയില്‍വേ ഉദ്യോഗസ്ഥന്മാരുടെ ഉത്തരവാദിത്വമില്ലായ്മയാണ് ഇവിടെ സ്ഥിരമായി പല ട്രെയിനുകളും പിടിച്ചിടുന്നതെന്ന് റെയില്‍വേ പാസഞ്ചേഴ്‌സ് അസോസിയേഷന്‍ പ്രസിഡന്റ് അഞ്ചു തൈക്കല്‍ ബാലചന്ദ്രന്‍ പറഞ്ഞു.