ബൊഗോട്ട: കൊളംബിയയില്‍ സര്‍ക്കാരും മാര്‍ക്‌സിസ്റ്റ് ഗ്രൂപ്പും (ഫാര്‍ക്) തമ്മിലുള്ള സമാധാന ഉടമ്പടിയെ ജനങ്ങള്‍ തള്ളി. ഇതുസംബന്ധിച്ച ഹിതപരിശോധനയില്‍ 50.2 ശതമാനം വോട്ടര്‍മാരും സമാധാന ഉടമ്പടിയെ എതിര്‍ത്തു. 49.8 ശതമാനം പേര്‍ സമാധാനം വേണമെന്നും വിധിയെഴുതി.
52 വര്‍ഷമായി ഫാര്‍ക് വിമതരും സര്‍ക്കാര്‍ സേനയും തമ്മില്‍ രാജ്യത്ത് യുദ്ധം നടക്കുകയാണ്. ഫാര്‍ക് വിമതര്‍ക്ക് സമൂഹത്തിലേക്ക് തിരിച്ചുവരവിനാണ് സമാധാന ഉടമ്പടിയുണ്ടാക്കിയത്. ഫാര്‍ക് വിമതര്‍ക്ക് പോരാട്ടം അവസാനിപ്പിച്ച് രാഷ്ട്രീയ പാര്‍ട്ടിയായി പ്രവര്‍ത്തിക്കാന്‍ അനുമതി നല്‍കുന്നതാണ് സമാധാന കരാര്‍.
1.3 കോടി വോട്ടര്‍മാരാണ് ഹിതപരിശോധനയില്‍ വോട്ട് ചെയ്തത്. ഇതില്‍ അരലക്ഷം പേരുടെ ഭൂരിപക്ഷമാണ് സമാധാന കരാര്‍ എതിര്‍ക്കുന്ന വിഭാഗത്തിനു ലഭിച്ചത്. 52 വര്‍ഷമായി തുടരുന്ന യുദ്ധം അവസാനിപ്പിക്കാന്‍ വേണ്ടിയുള്ള ഹിതപരിശോധനയാണ് അട്ടിമറിക്കപ്പെട്ടത്. സമാധാനത്തിനുള്ള ശ്രമം തുടരുമെന്ന് ഫാര്‍ക് വിമതര്‍ വ്യക്തമാക്കി. പ്രതിപക്ഷവും ഫാര്‍ക് നേതാക്കളുമായി ചര്‍ച്ച നടത്തിയിട്ടുണ്ട്.