പുല്‍വാമ: കശ്മീരിലെ പുല്‍വാമ ജില്ലയില്‍ നടന്ന പൊലിസ് ഏറ്റുമുട്ടലില്‍ മൂന്ന് ഹിസ്ബുല്‍ മുജാഹിദീന്‍ തീവ്രവാദികളെ വധിച്ചു. അഷ്ഫാഖ് അഹ്മദ് ദാര്‍, ഇഷ്ഫാഖ് അഹ്മദ് ബാബ, ഹസീബ് അഹ്മദ് എന്നിവരാണ് കൊല്ലപ്പെട്ടത്. സ്ഥലത്ത് തീവ്രവാദികള്‍ ക്യാമ്പ് ചെയ്തിട്ടുണ്ടെന്ന ഇന്റലിജന്‍സ് വിവരത്തെത്തുടര്‍ന്ന് പൊലിസും സൈനികരും സംയുക്തമായി നടത്തിയ തെരച്ചിലിനിടെ പരസ്പരം വെടിയുതിര്‍ക്കുകയായിരുന്നു. തുടര്‍ന്ന് രാഷ്ട്രീയ റൈഫിള്‍സ്, സ്‌പെഷ്യല്‍ ഓപ്പറേഷന്‍ ഗ്രൂപ്പ്, സി.ആര്‍.പി.എഫ് സൈനികര്‍ താവളം വളയുകയും മൂന്നുപേരെ വധിക്കുകയുമായിരുന്നു. വെള്ളിയാഴ്ച ഉച്ചയ്ക്ക് മൂന്നരയോടെയാണ് ഏറ്റുമുട്ടല്‍ തുടങ്ങിയത്. സൈനികര്‍ക്കെതിരെ വെടിയുതിര്‍ത്തവരില്‍ ചിലരെ ഇനിയും കണ്ടെത്താനുണ്ട്. ഇവര്‍ക്കായുള്ള തെരച്ചില്‍ തുടരുകയാണെന്ന് സൈനിക വൃത്തങ്ങള്‍ അറിയിച്ചു. ഏറ്റുമുട്ടല്‍ നടന്ന സ്ഥലത്തുനിന്ന് മൂന്ന് ആയുധങ്ങള്‍ കണ്ടെടുത്തിട്ടുണ്ട്.