മലപ്പുറം: സാധാരണക്കാരന്റെ പ്രശ്‌നങ്ങള്‍ക്ക് ശാശ്വത പരിഹാരം കണ്ടെത്തുന്നതിന്റെ ഭാഗമായി ജില്ലാ കലക്ടര്‍ എ.ഷൈനമോളുടെ നേതൃത്വത്തില്‍ നടത്തുന്ന 'ജില്ലാ ഭരണം ജനങ്ങള്‍ക്കരികെ' പരിപാടിക്ക് ഒക്‌ടോബര്‍ അഞ്ചിന് പൊന്നാനിയില്‍ തുടക്കം കുറിക്കും. പൊന്നാനി മിനി സിവില്‍ സ്റ്റേഷനി ലുള്ള  താലൂക്ക് കോണ്‍ഫ്രന്‍സ് ഹാളിലായിരിക്കും. പരിപാടി നടക്കുക. പൊന്നാനി നഗരം, മാറഞ്ചേരി,  വെളിയങ്കോട്, കാലടി, ഈഴുവത്തിരുത്തി തുടങ്ങിയ  അഞ്ച് വില്ലേജുകളിലെ ആളുകള്‍ക്ക് പരിപാടിയില്‍ പങ്കെടുക്കാം. ലഭിക്കുന്ന പരാതികള്‍ ബന്ധപ്പെട്ട വകുപ്പുകള്‍ക്ക് വേദിയില്‍ തന്നെ കൈമാറി പരമാവധി കേസുകളില്‍ അപ്പോള്‍ തന്നെ തീര്‍പ്പു കല്‍പ്പിക്കും. ഇതിനായി വിവിധ വകുപ്പുകളിലെ ജില്ലാതല ഉദ്യോഗസ്ഥരും പരിപാടിയില്‍ പങ്കെടുക്കും.
രാവിലെ 10 മുതല്‍ പൊതുജനങ്ങളില്‍ നിന്നും പരാതികളും അപേക്ഷകളും സ്വീകരിച്ച് രജിസ്‌ട്രേഷന്‍ നടത്തും.
പൊതുജനങ്ങളെ ബുദ്ധിമുട്ടിക്കുന്ന രീതിയിലുള്ള ഉദ്ഘാടന ചടങ്ങുകള്‍ പരിപാടിയില്‍ ഉണ്ടായിരിക്കില്ല. അവസാന പരാതിക്കാരന്റെയും പരാതി സ്വീകരിച്ചശേഷം മാത്രമേ പരിപാടി അവസാനിപ്പിക്കൂ.