ആലക്കോട്: തളിപ്പറമ്പ് കൂര്‍ഗ് ബോര്‍ഡര്‍ റോഡില്‍ കാറും ഓട്ടോറിക്ഷയും കൂട്ടിയിടിച്ച് രണ്ടുപേര്‍ക്കു പരുക്കേറ്റു.
ഓട്ടോ ഡ്രൈവര്‍ കുട്ടാപറമ്പിലെ ഓലിക്കല്‍ ലിറ്റോയെ (24) കണ്ണൂര്‍ എ.കെ.ജി ആശുപത്രിയിലും യാത്രക്കാരന്‍ കുറ്റികാട്ടുകുന്നേല്‍ കുര്യാച്ചനെ (48) തളിപ്പറമ്പ് സഹകരണ ആശുപത്രിയിലും പ്രവേശിപ്പിച്ചു. ഇന്നലെ രാവിലെ 11ഓടെ ആലക്കോട് സമാജം വളവിലായിരുന്നു അപകടം. ഉദയഗിരിയില്‍ നിന്നു വന്ന കാര്‍ മറ്റൊരു വാഹനത്തെ മറികടക്കുന്നതിനിടെ എതിര്‍ദിശയില്‍ നിന്നു വന്ന ഓട്ടോയില്‍ ഇടിക്കുകയായിരുന്നു. അപകടത്തില്‍ ഇരു വാഹനങ്ങളുടെയും മുന്‍ ഭാഗം പൂര്‍ണമായും തകര്‍ന്നു. ആലക്കോട് പൊലിസ് സ്ഥലത്തെത്തിയാണു വാഹനങ്ങള്‍ റോഡില്‍ നിന്നു നീക്കിയത്.