കുമ്പള: കര്‍ണാടകയില്‍ നിന്നും കവര്‍ന്ന ബൈക്കില്‍ വ്യാജ നമ്പര്‍ പ്ലേറ്റ് ഘടിപ്പിച്ച് കറങ്ങുന്നതിനിടെ യുവാവ് അറസ്റ്റില്‍.
മൊഗ്രാല്‍ ബദ്രിയ നഗര്‍ നീരോളി ഹൗസില്‍ മൊയ്തീന്‍ ഷംസീറി (24)നെയാണ് കുമ്പള എസ്.ഐ മെല്‍വിന്‍ ജോസ് അറസ്റ്റ് ചെയ്തത്.
ഇന്നലെ വൈകിട്ട് കുമ്പള ബദിയടുക്ക റോഡില്‍ നയിക്കാപ്പിനു സമീപം വാഹന പരിശോധന നടത്തുകയായിരുന്ന എസ്.ഐയും സംഘവും സംശയം തോന്നി പിടികൂടി ചോദ്യം ചെയ്തപ്പോളാണ് മോഷണവിവരം പ്രതി സമ്മതിച്ചത്.
പീന്നീട് നടത്തിയ അന്വേഷണത്തില്‍ കര്‍ണാടകയിലെ ഉറുവയില്‍ നിന്നും ഇക്കഴിഞ്ഞ ഓഗസ്റ്റ് 16ന് മോഷ്ടിച്ച ബൈക്കാണെന്ന് പ്രതി സമ്മതിച്ചതായി പൊലിസ് അറിയിച്ചു. പിന്നീട് നടത്തിയ അന്വേഷണത്തില്‍ ഓഗസ്റ്റ് 13 ന് കുമ്പള റെയില്‍വെ സ്റ്റേഷന്‍ പരിസരത്ത് നിന്നും മോഷണം പോയ മൊഗ്രാല്‍ സ്വദേശി ദില്‍ഷാദിന്റെ ബൈക്കും കണ്ടെത്തിയിട്ടുണ്ട്.
അന്വേഷണ സംഘത്തില്‍ അഡീഷണല്‍ എസ്.ഐ ഷെയ്ക് അബ്ദുല്‍ റസ്സാഖ്, സിവില്‍ പൊലിസ് ഓഫിസര്‍മാരായ പ്രതീഷ് ഗോപാല്‍, പ്രകാശന്‍, സതീഷന്‍ എന്നിവരുമുണ്ടായിരുന്നു.