കുമ്പള: വിദ്യാനഗര്‍ പെട്രോള്‍ പമ്പിന് സമീപം നിര്‍ത്തിയിട്ട ലോറി കടത്തിക്കൊണ്ടുപോയി ടയറുകള്‍ ഇളക്കിയെടുത്ത ശേഷം കുമ്പള ദേശീയ പാതയോരത്ത് ഉപേക്ഷിച്ചു. വിദ്യാനഗര്‍ സ്‌കൗട്ട് ഭവന്‍ സമീപത്തെ ശ്രീധരന്റെ ഉടമസ്ഥതയിലുള്ളതാണ് ലോറി. ഞായറാഴ്ച്ച രാത്രി വിദ്യാനഗര്‍ പെട്രോള്‍ പമ്പിന് സമീപമാണ് ലോറി നിര്‍ത്തിയിട്ടത്. ഇന്നലെ രാവിലെയാണ് ലോറി മോഷണം പോയത് അറിയുന്നത്. അന്വേഷിച്ച് വരുന്നതിനിടയില്‍ കുമ്പള ഷിറിയ ക്ഷേത്രത്തിന് സമീപം ഉപേക്ഷിച്ച നിലയില്‍ കണ്ടെത്തി. ലോറിയുടെ ആറു ടയറുകള്‍ കാണാനില്ല. രണ്ടു ലക്ഷം രൂപയുടെ നഷ്ടം കണക്കാക്കുന്നു. ശ്രീധരന്‍ കാസര്‍കോട് പൊലിസില്‍ പരാതി നല്‍കി.