അഞ്ചല്‍: വാടകവീട്ടില്‍ ചെടികളുടെ ഇടയിലായി കഞ്ചാവ് ചെടികള്‍ നട്ടുവളര്‍ത്തിയ കേസില്‍ രണ്ടു ബംഗാളി യുവാക്കളെ പൊലിസ് അറസ്റ്റ് ചെയ്തു.
ഓടനാവട്ടം ജയമാതാ ആശുപത്രിയ്ക്ക് സമീപം വാടകവീട്ടില്‍ താമസിക്കുന്ന ബംഗാള്‍ സ്വദേശികളായ അലിഷേക്ക്(19), റെജാഉള്‍ ഷേക്ക്(29) എന്നിവരെയാണ് പൂയപ്പള്ളി പൊലിസ് അറസ്റ്റ് ചെയ്തത്. ബംഗാളില്‍ നിന്നും കഞ്ചാവ് വിത്തുകളെത്തിച്ചാണ് ചെടികള്‍ നട്ടതെന്ന്  ഇവര്‍ പൊലിസിനോട് പറഞ്ഞു. റൂറല്‍ എസ്.പി അജിതാബീഗത്തിന് ലഭിച്ച രഹസ്യവിവരത്തിന്റെ അടിസ്ഥാനത്തിലാണ് പൂയപ്പള്ളി എസ്.ഐ സാബുജിയും സംഘവും ചേര്‍ന്ന് പ്രതികളെ കസ്റ്റഡിയിലെടുത്തത്.
കവറുകളില്‍ കിളിര്‍പ്പിച്ച് കെട്ടിടത്തിന്റെ മുകളില്‍ സൂക്ഷിച്ചിരുന്ന മൂന്ന് കഞ്ചാവ് ചെടികളും പൊലിസ് കണ്ടെടുത്തു. കൊട്ടാരക്കര കോടതിയില്‍ ഹാജരാക്കിയ പ്രതികളെ റിമാന്റ് ചെയ്തു.