കൊല്ലം: റോഡിന്റെ ടാറിങിനോടു ചേര്‍ന്ന താഴ്ചയിലേക്കു നിയന്ത്രണംവിട്ടുമറിഞ്ഞ സ്‌കൂട്ടറില്‍നിന്നും തെറിച്ചുവീണ കോളജ് അധ്യാപിക ടിപ്പര്‍ലോറി കയറി മരിച്ചു. മനയില്‍കുളങ്ങര റസിഡന്റ്‌സ് നഗര്‍ ഹൗസ് നമ്പര്‍ 74ല്‍, ക്വയിലോണ്‍ ടൂറിസ്റ്റ് ഹോം ഉടമ ഷിബുവിന്റെ ഭാര്യ ആര്‍.ഷീജയാണ് മരിച്ചത്. ഇന്നു രാവിലെ 8ന് കലക്ടറേറ്റിനുസമീപം തോപ്പില്‍കടവ് ഇറക്കത്തായിരുന്നു സംഭവം. മാവേലിക്കര പീറ്റ്‌മെമ്മേറിയല്‍ ബി.എഡ് കോളജ് കൊമേഴ്‌സ് വിഭാഗം അസി. പ്രൊഫസറായിരുന്നു. കോളജില്‍ പോകാന്‍ രാവിലെ കൊല്ലം റെയില്‍വേ സ്റ്റേഷനിലേക്കുള്ള യാത്രയിലായിരുന്നു ദാരുണാന്ത്യം.

അടുത്തിടെ ടാറിങ് പൂര്‍ത്തിയായ റോഡിന്റെ വശം മണ്ണിട്ടു നികത്താത്തതിനാല്‍ ഉണ്ടായ താഴ്ചയിലേക്കു നിയന്ത്രണംവിട്ടുമറിഞ്ഞ സ്‌കൂട്ടര്‍ ഇടതുവശത്തേക്കും ഷീജ വലതുവശത്തേക്കും മറിയുകയായിരുന്നു. തൊട്ടുപിന്നാലെ വന്ന ടിപ്പറിനടിയില്‍പ്പെട്ട ഷീജ തല്‍ക്ഷണം മരിച്ചു. നിര്‍ത്താതെപോയ ടിപ്പര്‍ ഹൈസ്‌കൂള്‍ ജങ്ഷനില്‍ വച്ച് പൊലിസ് പിടികൂടി. ഡ്രൈവര്‍ പൊലിസ് കസ്റ്റഡിയിലാണ്. പിതാവ്: കൃഷ്ണന്‍നായര്‍. മാതാവ്: രമാദേവി. മക്കള്‍: അഭിരാമി,ഗൗരി.