മാനന്തവാടി: വിധവയായ വൃദ്ധയ്ക്ക് വാര്‍ധക്യകാല പെന്‍ഷന്‍ നല്‍കാതെ വൈകിപ്പിച്ചെന്ന് പരാതി. തനിക്ക് ലഭിച്ചുകൊണ്ടിരിക്കുന്ന വാര്‍ധക്യകാല പെന്‍ഷന്‍ ഒരുമാസമായിട്ടും ലഭിച്ചിട്ടില്ലെന്നും ബാങ്കില്‍ അന്വേക്ഷിച്ചപ്പോള്‍ പെന്‍ഷന്‍ തുകയായ 9,300 രൂപ മാനന്തവാടി മുനിസിപ്പാലിറ്റി വികസനകാര്യ സ്റ്റാന്റിങ് കമ്മിറ്റി ചെയര്‍മാന്‍ പി.ടി ബിജു വാങ്ങിയതായി അറിയാന്‍ കഴിഞ്ഞുവെന്നും കാണിച്ച് കണിയാരം സ്വദേശിയും വിധവയുമായ ചിന്നമ്മ മാനന്തവാടി എ.എസ്.പിക്കും സി.ഐക്കും പരാതി നല്‍കി.
ബിജുവിന്റെ വീട്ടില്‍ചെന്ന് അന്വേഷിച്ചപ്പോള്‍ രണ്ട് ദിവസം കഴിഞ്ഞ് പണം നല്‍കാമെന്ന് പറയുകയും പീന്നീട് തരാതിരിക്കുകയും ചെയ്തു. അത് വീണ്ടും ചോദ്യം ചെയ്തപ്പോള്‍ അയല്‍വാസിയുടെ കൈയില്‍ 6,000 രൂപ കൊടുത്തു വിടുകയായിരുന്നു. എന്നാല്‍ 9,300 രൂപ ലഭിക്കേണ്ടിടത്ത് 6,000 രൂപ മാത്രം തന്നപ്പോള്‍ താനത് നിഷേധിച്ചതായും വൃദ്ധ നല്‍കിയ പരാതിയില്‍ പറയുന്നു. വിധവ കൂടിയായ തന്റെ പണം തട്ടിയെടുത്തവര്‍ക്കെതിരേ നിയമനടപടി സ്വീകരിക്കണമെന്നാണ് ഇവരുടെ ആവശ്യം.
വൃദ്ധയുടെ പെന്‍ഷന്‍തുക തട്ടിയെടുത്ത മുനിസിപ്പല്‍ സ്റ്റാന്റിങ് കമ്മിറ്റി ചെയര്‍മാനായ പി.ടി ബിജുവിന് ആ സ്ഥാനത്ത് തുടരാന്‍ അര്‍ഹതയില്ലെന്നും  കൗണ്‍സിലര്‍ സ്ഥാനം രാജിവെക്കണമെന്നും ആവശ്യപ്പെട്ട് പ്രതിപക്ഷവും ബി.ജെ.പിയും രംഗത്തെത്തിയിട്ടുണ്ട്. ഈ വിഷയം മുനിസിപ്പല്‍ ഭരണസമിതിയോഗം ചര്‍ച്ച ചെയ്യണമെന്ന പ്രതിപക്ഷത്തിന്റെ ആവശ്യം ഭരണസമിതി അംഗീകരിക്കാത്തതിനെ തുടര്‍ന്ന് പ്രതിപക്ഷം ഭരണസമിതിയോഗം ബഹിഷ്‌ക്കരിച്ചു. നടപടി വേണമെന്ന് ആവശ്യപ്പെട്ട് യു.ഡി.എഫ് മുന്‍സിപ്പല്‍ ഓഫിസിന് മുന്‍പില്‍ ധര്‍ണയും നടത്തി. എന്നാല്‍ ആരോപണം രാഷ്ട്രീയ പ്രേരിതമാണെന്നും വൃദ്ധ വീട്ടിലില്ലാത്തതിനാലാണ് ഏജന്റുമാര്‍ക്ക് പെന്‍ഷന്‍ നല്‍കാന്‍ കഴിയാതിരുന്നതെന്നും പി.ടി ബിജു വ്യക്തമാക്കി. പെന്‍ഷന്‍ നല്‍കാനായി ചെന്ന സമയങ്ങളിലെല്ലാം വൃദ്ധ ബന്ധുവീട്ടിലായിരുന്നു. അതിനുശേഷം തിരികെ വന്ന് തന്നോട് പെന്‍ഷന്റെ കാര്യം ആവശ്യപ്പെട്ടപ്പോള്‍ ബന്ധപ്പെട്ട ഏജന്റുമാരെ താന്‍ വിവരം ധരിപ്പിച്ചിരുന്നതായും പിന്നീട് കൈയിലുണ്ടായിരുന്ന 6,000 രൂപ കൊടുത്തുവിടുകയുമായിരുന്നു. കഴിഞ്ഞദിവസം അവശേഷിക്കുന്ന തുകയായ 3,200 രൂപ  കൊടുക്കാന്‍ നോക്കുമ്പോഴാണ് 6,000 രൂപ അവര്‍ കൈപ്പറ്റാതിരുന്ന വിവരം അറിയുന്നതെന്നും ബിജു വ്യക്തമാക്കി. ഈ വിഷയത്തിന്റെ പേരില്‍ ചിലര്‍ നടത്തുന്നത് രാഷ്ട്രീയ മുതലെടുപ്പാണെന്നും ബിജു പറഞ്ഞു.