ബദിയടുക്ക (കാസര്‍കോട്): എക്‌സൈസ് സംഘം നടത്തിയ മിന്നല്‍ പരിശോധനയില്‍ എട്ടു ലക്ഷത്തോളം രൂപ വിലവരുന്ന ലഹരിവസ്തുക്കള്‍ പിടികൂടി. ബദിയടുക്ക ചെന്നാര്‍ കട്ടയിലെ ഒരു ഗോഡൗണില്‍ നടത്തിയ പരിശോധനയിലാണ് പാന്‍മസാലയടക്കമുള്ള ലഹരിവസ്തുക്കള്‍ പിടികൂടിയത്. സംഭവത്തില്‍ ഏത്തടുക്കം പുത്രക്കളയിലെ ഹരിപ്രസാദ് (33), കര്‍ണാടക അര്‍ളപ്പദവ് കണാജെ തുമ്പടുക്ക സ്വദേശി  സന്ദേശ് (22) എന്നിവരെ അറസ്റ്റ് ചെയ്തു. 1,82,600 പായ്ക്കറ്റ് പാന്‍മസാലകളാണ് പിടിച്ചെടുത്തത്. നൂറോളം ചെറിയ ചാക്കുകളില്‍ നിറച്ച നിലയിലായിരുന്നു ലഹരിവസ്തുക്കള്‍.
ബദിയടുക്ക റെയ്ഞ്ച് അസിസ്റ്റന്റ് എക്‌സൈസ് ഇന്‍സ്‌പെക്ടര്‍ റെനി ഫെര്‍ണാണ്ടസിന്റെ നേതൃത്വത്തിലുള്ള സംഘമാണ് കാസര്‍കോട് ഡെപ്യൂട്ടി എക്‌സൈസ് കമ്മിഷണര്‍ മുഹമ്മദ് റാഷിദിന് ലഭിച്ച രഹസ്യവിവരത്തിന്റെ അടിസ്ഥാനത്തില്‍ പരിശോധന നടത്തിയത്. കര്‍ണാടകയില്‍ നിന്ന് പാന്‍മസാല ഉല്‍പ്പന്നങ്ങള്‍ കാസര്‍കോട് ജില്ലയിലെ വിവിധ ഭാഗങ്ങളിലെത്തിച്ച് വ്യാപകമായി വിതരണം ചെയ്യുന്ന സംഘത്തില്‍പ്പെട്ടവരാണ് പിടിയിലായതെന്ന് എക്‌സൈസ് അധികൃതര്‍ പറഞ്ഞു.