കൊച്ചി: അനധികൃത സ്വത്ത് സമ്പാദന കേസില്‍ പ്രതിയായ മുന്‍ മന്ത്രി കെ.ബാബു അദ്ദേഹത്തിന്റെ ബിനാമികളെന്ന് സംശയിക്കുന്നവരുമായി ഫോണില്‍ ബന്ധപ്പെട്ടതിന്റെ തെളിവുകള്‍ വിജിലന്‍സിന് ലഭിച്ചു. ബിനാമികളെന്ന് വിജിലന്‍സ് പ്രാഥമിക അന്വേഷണത്തില്‍ കണ്ടെത്തി കേസെടുത്ത ബാബുറാം, മോഹനന്‍ എന്നിവരുമായി ബാബു നിരന്തരം ബന്ധപ്പെട്ടതിന്റെ ഫോണ്‍ രേഖകളാണ് വിജിലന്‍സിന് ലഭിച്ചത്.
 കഴിഞ്ഞ ഒരു വര്‍ഷത്തിനിടെ കെ.ബാബുവും ബാബുറാമും 150 ലേറെ തവണ ബന്ധപ്പെട്ടിരുന്നെന്ന് മൊബൈല്‍ സേവനദാതാക്കള്‍ നല്‍കിയ രേഖയിലുണ്ട്. ബാബുറാം, മോഹനന്‍ എന്നിവരുമായി വ്യക്തിപരമായി അടുപ്പമില്ലെന്നാണ് വിജിലന്‍സ് റെയ്ഡ് നടന്നതിനുപിന്നാലെ ബാബു വാര്‍ത്താസമ്മേളനം നടത്തി പറഞ്ഞിരുന്നത്. കോണ്‍ഗ്രസ് പ്രവര്‍ത്തകന്‍ എന്ന നിലയില്‍ മാത്രമാണ് ബാബുറാമുമായുള്ള പരിചയമെന്നും ബേക്കറി ശൃംഖലയുടെ ഉടമയായ മോഹന നുമായി അടുപ്പമില്ലെന്നും ബാബു വിശദീകരിച്ചിരുന്നു.
എന്നാല്‍, ഫോണ്‍ സംഭാഷണത്തിന്റെ രേഖകള്‍  തെളിവായി വിജിലന്‍സ് അന്വേഷണസംഘത്തിന് ലഭിച്ചതോടെ നിര്‍ണായകമായ തെളിവായി മാറി. അതിനിടെ, ഡിവൈ.എസ്.പി കെ.ആര്‍ വേണുഗോപാലന്‍ കതൃക്കടവിലെ വിജിലന്‍സ് ഓഫിസില്‍ ബാബുറാമിനെ വിളിച്ചുവരുത്തി ഇന്നലെ ചോദ്യംചെയ്തു. ഇയാളുടെ വീട്ടില്‍ നടത്തിയ റെയ്ഡില്‍ ലഭിച്ച രേഖകളും തുടര്‍പരിശോധനകളില്‍ ലഭിച്ച രേഖകളും മുന്‍നിര്‍ത്തിയുള്ള പ്രാഥമിക ചോദ്യം ചെയ്യലാണ് നടന്നതെന്ന് വിജിലന്‍സ് വൃത്തങ്ങള്‍ പറഞ്ഞു. വിശദമായ ചോദ്യംചെയ്യല്‍ ഘട്ടംഘട്ടമായി നടത്താനാണ് തീരുമാനം. ഭൂമി ഇടപാടിന് ഉപയോഗിച്ച പണത്തിന്റെ ഉറവിടം സംബന്ധിച്ച വിവരങ്ങളും ബാബുറാമിനോട് ആരാഞ്ഞു. ഇയാള്‍ നല്‍കിയ വിശദീകരണങ്ങള്‍ വിശദമായി പരിശോധിച്ച ശേഷം വീണ്ടും ഇയാളെ ചോദ്യം ചെയ്യും.തന്റെ വീട്ടില്‍ നിന്ന് വിജിലന്‍സ് പിടിച്ചെടുത്ത രേഖകള്‍ വിട്ടുകിട്ടണമെന്നാവശ്യപ്പെട്ട് ബാബുറാം മൂവാറ്റുപുഴ വിജിലന്‍സ് കോടതിയില്‍ അപേക്ഷ നല്‍കിയിട്ടുണ്ട്.