തൃശൂര്‍: ശനിയാഴ്ച രാത്രി  പാലിയേക്കര സമാന്തരപാത പൊലിസ് സഹായത്തോടെ അധികൃതര്‍ വീണ്ടും അടച്ചു. യാത്രക്കാരുടെ സഞ്ചാരസ്വാതന്ത്ര്യം തടസപ്പെടുത്തുന്ന നടപടിയില്‍ വ്യാപകപ്രതിഷേധമുയര്‍ന്നിട്ടുണ്ട്. ടോള്‍ നല്‍കാതെ വാഹനങ്ങള്‍കടന്നുപോകുന്നതിനുള്ള പഴയ ദേശീയപാതയില്‍ ടോള്‍ കമ്പനി കെട്ടിയ തടസമാണ് കഴിഞ്ഞദിവസം പൊളിച്ചുനീക്കിയത്.
അതേസ്ഥലത്താണ് കഴിഞ്ഞ ദിവസം രാത്രി രണ്ടിനു വന്‍ പൊലിസ് സന്നാഹത്തോടെ അധികൃതര്‍ ചെറുവാഹനങ്ങള്‍ക്കുപോലും തടസമാകുന്ന വിധത്തില്‍ ഇരുമ്പുതൂണുകള്‍ കോണ്‍ക്രീറ്റ് ചെയ്ത് ഉറപ്പിച്ചത്.
പ്രത്യേകം തയാറാക്കിയ ഇരുമ്പുതൂണുകള്‍ ഇവിടെയെത്തിക്കുകയായിരുന്നു. ജില്ലാ കലക്ടറുടെ നിര്‍ദേശത്തെ തുടര്‍ന്ന് അറുത്തുമാറ്റിയ ഇരുമ്പുതൂണുകള്‍ നീക്കം ചെയ്യാതെയാണ് പുതിയത് സ്ഥാപിച്ചത്. കോടതി അലക്ഷ്യമാകുമെന്നതിനാലാണ് സമാന്തരപാത വീണ്ടും അടച്ചുപൂട്ടാന്‍ നിര്‍ദേശം നല്‍കിയതെന്നാണ് കലക്ടറുടെ വിശദീകരണം.
തടസം മാറ്റണമെന്നാവശ്യപ്പെട്ട് രാഷ്ട്രീയ, മനുഷ്യാവകാശ സംഘടനാപ്രവര്‍ത്തകര്‍ പരാതി നല്‍കിയതിനെ തുടര്‍ന്ന് കഴിഞ്ഞദിവസം പി.ഡബ്ല്യു.ഡിക്കും ഹൈവേ അതോറിറ്റിക്കും തടസം നീക്കം ചെയ്യണമെന്നാവശ്യപ്പെട്ട് കലക്ടര്‍ ഡോ. എ. കൗശിഗന്‍ ഉത്തരവ് നല്‍കിയിരുന്നു. ഇതിനെ തുടര്‍ന്ന് ശനിയാഴ്ച ഉച്ചയോടെ നാഷനല്‍ ഹൈവേ അതോറിറ്റി പരിശോധനയ്ക്കു എത്തുകയും ചെയ്തു.
പരിശോധനയില്‍ പുതുക്കാട് മണലി ഭാഗത്തുനിന്നു പുലക്കാട്ടുകരയിലേക്കു പോകുന്നവഴി ടോള്‍ കമ്പനി വലിയ ഇരുമ്പ് റെയില്‍ പ്ലെയ്റ്റുകള്‍ ഉപയോഗിച്ചു ഗതാഗതം തടസപ്പെടുത്തിയതായി കണ്ടെത്തുകയും ചെയ്തു.
കലക്ടറുടെ ഉത്തരവ് നടപ്പാക്കാന്‍ നാഷനല്‍ ഹൈവേ അധികതൃതരോ ടോള്‍ കമ്പനിയോ  തയാറായിരുന്നില്ല.
ഈ ഘട്ടത്തിലാണ് ജനകീയമായി തടസങ്ങള്‍ നീക്കം ചെയ്തതെന്ന് സി.പി.ഐ (എം.എല്‍) നേതാക്കള്‍ പറഞ്ഞിരുന്നു. തടസം നീങ്ങിയതോടെ വാഹനങ്ങള്‍ക്കു ഇതുവഴി ടോള്‍ നല്‍കാതെ കടന്നുപോകാവുന്ന നിലയായിരുന്നു. പാലിയേക്കരയിലെ സമാന്തരപാത തുറക്കുന്നതിനുള്ള ടെന്‍ഡര്‍ നടപടി തുടങ്ങിയ ഘട്ടത്തിനിടെയാണ് കഴിഞ്ഞദിവസം ഇരുമ്പുതൂണുകള്‍ മുറിച്ചുമാറ്റിയ സംഭവം ഉണ്ടായത്. ഇതിനെതിരേ ടോള്‍ കമ്പനി പൊലിസിലും മറ്റും പരാതി നല്‍കിയിരുന്നു. പരാതിയെ തുടര്‍ന്ന് സര്‍ക്കാര്‍ തന്നെ തൂണുകള്‍ സ്ഥാപിക്കാന്‍ അനുമതി നല്‍കിയെന്നാണ് പറയുന്നത്.
ഇതു ടോള്‍കമ്പനിയും സര്‍ക്കാരും തമ്മിലുള്ള ഒത്തുകളിയുടെ ഭാഗമാണെന്നു ദേശീയപാത സംരക്ഷണ സമിതി സംസ്ഥാന കണ്‍വീനര്‍ ഹാഷിം ചേന്ദംപിള്ളി ആരോപിച്ചു. 400 കോടി രൂപ നാലുവര്‍ഷത്തിനുള്ളില്‍ പിരിച്ചെടുത്തതായാണ് ടോള്‍ കമ്പനി തന്നെ വ്യക്തമാക്കിയിട്ടുള്ളത്.
ഇതു യാഥാര്‍ഥ കണക്കല്ലെന്നും അദ്ദേഹം പറഞ്ഞു. കലക്ടര്‍ ഉത്തരവിട്ട പാലിയേക്കരയിലെ സമാന്തര റോഡ് പൊലിസിന്റെ അകമ്പടിയോടെ വീണ്ടും അടച്ചുപൂട്ടിയ സര്‍ക്കാര്‍ ബി.ഒ.ടി ടോള്‍ കമ്പനിയുടെ ഏജന്റാണെന്ന് തെളിയിക്കുകയാണെന്ന് ആം ആദ്മി പാര്‍ട്ടി സംസ്ഥാന കണ്‍വീനര്‍ സി.ആര്‍ നീലകണ്ഠന്‍ പറഞ്ഞു.