പേരാമ്പ്ര: ആശുപത്രിയിലേക്കുള്ള യാത്രക്കിടയില്‍ ഓട്ടോറിക്ഷയില്‍ മറന്നുവച്ച പണവും വില പിടിപ്പുള്ള രേഖകളും ഉടമയ്ക്കു തിരിച്ചുനല്‍കി ഓട്ടോ ഡ്രൈവര്‍ മാതൃകയായി. വാല്യക്കോട് സ്വദേശിയായ റിയാസാണു തന്റെ ഓട്ടോയില്‍നിന്നു ലഭിച്ച 20,000 രൂപയും ചെക്ക്ബുക്കും ബാങ്ക് പാസ്ബുക്കും ഉള്‍പ്പെടെ സൂക്ഷിച്ച ബാഗ് പേരാമ്പ്ര പൊലിസ് സ്റ്റേഷനിലെത്തിച്ചത്.
അഡിഷനല്‍ എസ്.ഐ എന്‍.കെ വേണുഗോപാലിന്റെ സാന്നിധ്യത്തില്‍ എ.എസ്.ഐ ഗോപാലകൃഷ്ണന്‍ ഉടമയായ എരവട്ടൂരിലെ തറോപൊയില്‍ ഇബ്‌റാഹീമിനു ബാഗ് കൈമാറി. തിങ്കളാഴ്ച വൈകിട്ടു മൂന്നിന് ചെമ്പ്ര റോഡില്‍ നിന്നാണ് ഇബ്‌റാഹീം ഓട്ടോ വിളിച്ചത്. ബാഗിനോടൊപ്പം ഉടമസ്ഥനില്ലാത്ത നിലയില്‍ ലഭിച്ച പുസ്തകങ്ങളടങ്ങിയ കവര്‍ സ്റ്റേഷനില്‍ സൂക്ഷിച്ചിട്ടുണ്ട്.
നൊച്ചാട് പഞ്ചായത്ത് മുസ്‌ലിം യൂത്ത് ലീഗ് സെക്രട്ടറിയായ റിയാസ് വാല്യകോടിനെ പഞ്ചായത്ത് യൂത്ത് ലീഗ് കമ്മിറ്റി അഭിനന്ദിച്ചു. പി.സി മുഹമ്മദ് സിറാജ് അധ്യക്ഷനായി. സലീം മിലാസ്, ശാമില്‍ കെ.എം, ഷംജിത് എരോത്ത്, അസ്ബീര്‍ പി.കെ സംസാരിച്ചു.