പൊന്നാനി :  കുറ്റിപ്പുറത്ത് നിന്ന് തിരുപ്പൂരിലേക്കു ട്രെയിനില്‍ യാത്രചെയ്യുകയായിരുന്ന നിയമ വിദ്യാര്‍ഥിയെ റെയില്‍വെ പൊലിസ് അന്യായമായി മുഖത്തടിക്കുകയും ഭീഷണിപ്പെടുത്തുകയും ചെയ്തതായി പരാതി.
പൊന്നാനി സ്വദേശിയായ അനസിനെയാണു പാലക്കാട് വെച്ച് റെയില്‍വേ പൊലിസ് ശശിധരന്‍ മുഖത്തടിച്ചത്. എം ജി യൂനിവേഴ്‌സിറ്റിയിലെ നിയമവിദ്യാര്‍ഥിയായ അനസും പൊന്നാനിക്കാരനായ മറ്റൊരു സുഹൃത്തും തിരുപ്പൂരിലേക്കു പോകാന്‍ കുറ്റിപ്പുറത്തു നിന്ന് ട്രെയിനില്‍ കയറിയതായിരുന്നു .
തിരക്കായതിനാല്‍ സ്ലീപ്പര്‍ ടിക്കറ്റ് കിട്ടിയില്ല .സ്ലീപ്പര്‍ കോച്ചില്‍ കയറി ടിക്കറ്റ് അപ്‌ഗ്രേഡ് ചെയ്യാന്‍ ടി ടി ആറിനോട് ആവശ്യപ്പെട്ടിരുന്നു .പിന്നീട് വന്ന സ്‌പെഷ്യല്‍ ഓഫിസര്‍ ടിക്കറ്റ് ചോദിച്ചതോടെയാണു പ്രശ്‌നങ്ങള്‍ തുടങ്ങിയത്. യൂനിഫോം ഇല്ലാത്തതിനാല്‍ വിദ്യാര്‍ഥികള്‍ ഇവരെ ചോദ്യം ചെയ്തു.
ഇതോടെ റെയില്‍വേ പൊലിസുകാര്‍ എത്തി. ഇതിനിടെയാണു ശശിധരന്‍ മര്‍ദിച്ചതെന്നു വിദ്യാര്‍ഥികള്‍ പറയുന്നു. റെയില്‍വേ പൊലിസിനെതിരെ പരാതിനല്‍കി.