മമ്പുറം: മഖാമിലെത്തുന്ന തീര്‍ഥാടകരുടെ സൗകര്യം പരിഗണിച്ച് മമ്പുറത്തെ പുതിയ പാലം താത്കാലികമായി കാല്‍നടക്കുവേണ്ടി തുറന്നുകൊടുക്കും. മമ്പുറം സ്വലാത്ത് നടക്കുന്ന വ്യാഴാഴ്ചയും പ്രാര്‍ഥനാ സമ്മേളനം നടക്കുന്ന ശനിയാഴ്ചയും വൈകീട്ട് നാലു മുതല്‍ രാത്രി ഒന്‍പത് മണി വരെയും നേര്‍ച്ചയുടെ സമാപന ദിവസമായ ഞായറാഴ്ച രാവിലെ എട്ടുമണി മുതല്‍ വൈകീട്ട് അഞ്ച് മണി വരെയുമായിരിക്കും തുറന്നുകൊടുക്കുക.
തിരൂരങ്ങാടി നഗരസഭയെയും എ.ആര്‍ നഗര്‍ പഞ്ചായത്തിനെയും ബന്ധിപ്പിക്കുന്ന പുതിയ പാലത്തിന്റെ നിര്‍മാണ പ്രവര്‍ത്തനങ്ങള്‍ അവസാനഘട്ടത്തിലാണിപ്പോള്‍.  250 മീറ്റര്‍ നീളവും 12 മീറ്റര്‍ വീതിയയുമുള്ള പുതിയ പാലം ദാറുല്‍ ഹുദാ മാനേജ്‌മെന്റ് സൗജന്യമായി വിട്ടുനല്‍കിയ സ്ഥലം വഴിയാണ് കടന്നുപോകുന്നത്. മലപ്പുറം പരപ്പനങ്ങാടി റോഡിനെയും മമ്പുറം മഖാമിലൂടെ ദേശീയ പാത 17 നെയും ബന്ധിപ്പിച്ച് കടലുണ്ടിപ്പുഴക്ക് കുറുകെ നിര്‍മിച്ച പുതിയ പാലം ജനങ്ങള്‍ക്കായി തുറക്കപ്പെടുന്നതോടെ വിവിധ ദിക്കുകളില്‍ നിന്നുള്ള തീര്‍ത്ഥാടകര്‍ക്ക് മഖാമിലെത്താന്‍ ഏറെ സൗകര്യപ്രദമാവും. കാലങ്ങളായി അനുഭവിക്കുന്ന യാത്രാ ബുദ്ധിമുട്ടിനും ഗതാഗതക്കുരിക്കിനും പരിഹാരവുമാവും. മമ്പുറത്തെത്തുന്ന തീര്‍ഥാടകരുടെയും നാട്ടുകാരുടെയും നിരന്തര ആവശ്യമായിരുന്ന പാലം യാഥാര്‍ഥ്യമാക്കിയത് മുന്‍മന്ത്രിമാരായ  പി.കെ കുഞ്ഞാലിക്കുട്ടിയുടെയും അബ്ദുറബ്ബിന്റെയും നിരന്തര ഇടപെടലുകള്‍ മൂലമാണ്.