കുടക്: സിദ്ധാപുരത്ത് ജനവാസ കേന്ദ്രത്തിലിറങ്ങിയ കാട്ടാന മണിക്കൂറുകളോളം നാട്ടുകാരെ വിറപ്പിച്ചു. ഒരു ബൈക്ക് കാട്ടാന തകര്‍ക്കുകയും ചെയ്തു. കഴിഞ്ഞ ദിവസം പുലര്‍ച്ചെ അഞ്ചരയോടയാണ് സിദ്ധാപുരത്തിനടുത്ത് നെല്ല്യാഹുദിക്കരി പുഴക്കരക്കുംമ്പാരക്കുണ്ടില്‍ കാട്ടാന ഇറങ്ങിയത്. ആനയെ കണ്ട് ആളുകള്‍ ബഹളം വെച്ചതിനെ തുടര്‍ന്ന് ആന തോട്ടത്തിലേക്ക് ഓടിമറഞ്ഞു. തോട്ടത്തിലേക്കു പോകുന്ന വഴിയിലുണ്ടായിരുന്ന ബൈക്കാണ് ആന ചവിട്ടിയിട്ടത്. തോട്ടത്തിലെ തൊഴിലാളി സുനിലിന്റെതായിരുന്നു ബൈക്ക്. നിരവധി ആളുകള്‍ താമസിക്കുന്ന പ്രദേശത്താണ് ആനയിറങ്ങിയത്. പുലര്‍ച്ചെയായതിനാല്‍ ആന വന്നവഴിയില്‍ ആരും ഉണ്ടായിരുന്നില്ല. ആളുകളുടെ ബഹളം കേട്ട് തിരിച്ചോടിയ ആന ഏറെനേരം തോട്ടത്തില്‍ തന്നെ നിന്നു. ആള്‍ക്കൂട്ടം ബഹളം വെക്കുന്നത് തുടര്‍ന്നപ്പോഴാണ് ആന ഉള്‍ക്കാട്ടിലേക്ക് പോയത്. കുടകിന്റെ വിവിധ മേഖലകളില്‍ നിരവധി പേരാണ് ആനയുടെ അക്രമത്തില്‍ മരണപ്പെട്ടത്. നിരവധി പേര്‍ക്ക് പരുക്കേല്‍ക്കുകയും ചെയ്തു. ആളെകൊല്ലികളായ രണ്ട് ആനകളെ ഈയിടെയാണ് ഈ മേഖലയില്‍ നിന്ന് പിടികൂടിയത്.