തലശ്ശേരി: കെ.എസ്.ആര്‍.ടി.സി ജീവനക്കാരുടെ ശമ്പളം യഥാസമയം നല്‍കാത്തതില്‍ പ്രതിഷേധിച്ചു തലശ്ശേരി ഡിപ്പോയിലെ ജീവനക്കാര്‍ ട്രാന്‍സ്‌പോര്‍ട്ട് ഡമോക്രാറ്റിക് ഫെഡറേഷന്‍ നേതൃത്വത്തില്‍ അസി.ട്രാന്‍സ്‌പോര്‍ട്ട് ഓഫിസറെ ഉപരോധിച്ചു. ഇന്നലെയും ശമ്പളം ലഭിക്കാത്തതിനാല്‍ ഇന്നു മുതല്‍ ഫെഡറേഷന്റെ രണ്ടു നേതാക്കള്‍ അനിശ്ചിതകാല നിരാഹാരം നടത്തും.
സമരത്തിന് അനുഭാവം പ്രകടിപ്പിച്ച് സംഘടനാപ്രവര്‍ത്തകരും നിരാഹാരം അനുഷ്ഠിക്കും. ശമ്പളം മുടങ്ങിയതിനെ തുടര്‍ന്നു തിങ്കളാഴ്ച ജീവനക്കാര്‍  പ്രതിഷേധിച്ചിരുന്നു. എന്നാല്‍ ചൊവ്വാഴ്ചയും തത്സ്ഥിതി തുടര്‍ന്നതോടെ ഇന്നലെ രാവിലെ മുതല്‍ എ.ടി.ഒയെ ഉപരോധിക്കുകയായിരുന്നു. തിരുവനന്തപുരത്തെ കെ.എസ്.ആര്‍.ടി.സി ആസ്ഥാനവുമായി എ.ടി.ഒ ഫോണില്‍ ബന്ധപ്പെട്ടതിനെ തുടര്‍ന്ന് വൈകുന്നേരം നാലിനകം ശമ്പളം ലഭിക്കുമെന്ന് ഉറപ്പു നല്‍കി. ഇതേ തുടര്‍ന്നു ഉപരോധം ഉച്ചയോടെ പിന്‍വലിച്ചു. എന്നാല്‍ ഇന്നലെ വൈകിട്ടും പണം ലഭിക്കാത്തതിനെ തുടര്‍ന്നാണ് അനിശ്ചിതകാല സമരം നടത്താന്‍ തീരുമാനമായത്. ഉപരോധത്തിനു  പ്രസിഡന്റ് വി മനോജ്, കെ.വി പ്രദീപ്കുമാര്‍ നേതൃത്വം നല്‍കി.