കൂത്തുപറമ്പ്: ഡി.വൈ.എഫ്.ഐ പ്രാദേശിക നേതാവിനെ വെട്ടിപ്പരുക്കേല്‍പിച്ച കേസില്‍ രണ്ട് ആര്‍.എസ്.എസ് പ്രവര്‍ത്തകരെ പൊലിസ് അറസ്റ്റുചെയ്തു. ഡി.വൈ.എഫ്.ഐ കൈതേരി മേഖലാ വൈസ് പ്രസിഡന്റ് എം അനൂപിനെ (30) ആക്രമിച്ച കേസില്‍ കൈതേരിയിലെ ഹര്‍ഷിന്‍ ബാബു (20), പത്തായക്കുന്നിലെ സുഷിന്‍ (21) എന്നിവരെയാണ് സി.ഐ സുരേഷ് ബാബുവും സംഘവും പിടികൂടിയത്. തിങ്കളാഴ്ച വൈകുന്നേരം തൊക്കിലങ്ങാടിയില്‍ വച്ചായിരുന്നു അനൂപിന് നേരെ ആക്രമണമുണ്ടായത്. പ്രതികളെ ഇന്നു കോടതിയില്‍ ഹാജരാക്കും. സംഭവത്തില്‍ ഒന്‍പതു പേര്‍ക്കെതിരേയാണു പൊലിസ് കേസെടുത്തത്.  ഓട്ടോഡ്രൈവര്‍ കൂടിയായ അനൂപിനെ ആക്രമിച്ചതില്‍ പ്രതിഷേധിച്ച് ഓട്ടോ തൊഴിലാളി യൂനിയന്റെ (സി.ഐ.ടി.യു) ആഹ്വാന പ്രകാരം ഇന്നലെ കൂത്തുപറമ്പില്‍ ഓട്ടോ ഡ്രൈവര്‍മാര്‍ പണിമുടക്കി. ഡ്രൈവര്‍മാര്‍ ടൗണില്‍ പ്രതിഷേധ പ്രകടനം നടത്തി.