കൂത്തുപറമ്പ്: ചിറ്റാരിപറമ്പ് ചെള്ളത്ത് വയലില്‍ വീടിന്റെ വാതില്‍ തകര്‍ത്ത് 30 പവന്‍ സ്വര്‍ണവും മൂവായിരം രൂപയും കവര്‍ച്ച നടത്തിയ സംഭവത്തില്‍ പൊലിസ് അന്വേഷണം ഊര്‍ജിതമാക്കി. ചെള്ളത്ത് വയല്‍ എല്‍.പി സ്‌കൂളിനടുത്തെ എ.ടി ഷാഹിദയുടെ വീട്ടിലാണ് കഴിഞ്ഞ ദിവസം മോഷണം നടന്നത്. കിടപ്പുമുറിയിലെ മേശയില്‍ സൂക്ഷിച്ച 30 പവന്‍ സ്വര്‍ണാഭരണങ്ങളും മൂവായിരം രൂപയും എ.ടി.എം കാര്‍ഡ്, പാസ്‌പോര്‍ട്ട് എന്നിവയുമാണ് നഷ്ടപ്പെട്ടത്. അന്വേഷണത്തിന്റെ ഭാഗമായി കണ്ണവം എസ്.ഐ ഷിജുവിന്റെ നേതൃത്വത്തില്‍ പൊലിസും കണ്ണൂരില്‍ നിന്നു വിരലടയാള വിദഗ്ധരും ഡോഗ് സ്‌ക്വാഡും ഇന്നലെ രാവിലെ വീട്ടിലെത്തി പരിശോധന നടത്തി. മോഷ്ടിച്ച എ.ടി.എം കാര്‍ഡുപയോഗിച്ച് അക്കൗണ്ടില്‍ നിന്നു ഇരുപതിനായിരം രൂപ പിന്‍വലിച്ചതായും പൊലിസ് അന്വേഷണത്തില്‍ വ്യക്തമായി.