കൊല്ലം: ശമ്പളം ലഭിക്കാത്തതിനെ തുടര്‍ന്ന് കെ.എസ്.ആര്‍.ടി.സി ജീവനക്കാര്‍ കൊല്ലത്തു നടത്തുന്ന പ്രതിഷേധ പണിമുടക്കിനെ തുടര്‍ന്നു സര്‍വീസുകള്‍ നിശ്ചലമായി. കൊല്ലത്തു സമരം കൂടുതല്‍ ശക്തമായി. ജീവനക്കാര്‍ കൂട്ടത്തോടെ പ്രതിഷേധവുമായി രംഗത്തെത്തിയതോടെ ദീര്‍ഘദൂര സര്‍വീസുകള്‍ അടക്കം മുടങ്ങി. ശമ്പളം ലഭിക്കാതെ സമരം പിന്‍വലിക്കില്ലെന്ന നിലപാടിലാണ് ജീവനക്കാര്‍.

ദീര്‍ഘദൂര സര്‍വീസുകള്‍ അടക്കം മുടങ്ങിയത് യാത്രക്കാരെ വലച്ചു. ഇതേത്തുടര്‍ന്ന് ജില്ലയിലെ ബസ് സ്റ്റാന്‍ഡുകളില്‍ വന്‍ തിരക്കാണ് അനുഭവപ്പെടുന്നത്. കൊല്ലത്ത് ഇടതു തൊഴിലാളി സംഘടനയായ സി.ഐ.ടി.യു അടക്കമുള്ളവയാണ് ജില്ലയില്‍ സമരം നടത്തുന്നത്. കെ.എസ്.ആര്‍.ടി.സിക്ക് കടം നല്‍കുന്നതില്‍ നിന്ന് ധനകാര്യ സ്ഥാപനങ്ങള്‍ പിന്മാറിയതോടെയാണ് ശമ്പളവിതരണം നിലച്ചത്.