ജിദ്ദ: പന്ത്രണ്ടു വര്‍ഷത്തിനിടെ ആദ്യമായി സഊദിയില്‍ നിന്നും വിദേശികള്‍ സ്വന്തം നാടുകളിലേക്ക് പണമയക്കുന്നതില്‍ വന്‍ ഇടിവ്.  സ്വദേശിവത്കരണത്തിന്റെ പേരില്‍ നിരവധി സഊദികളെ നിയമിച്ചതാണ് ഇതിനു കാരണമെന്നാണ് സാമ്പത്തിക വിദഗ്ധരുടെ അഭിപ്രായം.
കഴിഞ്ഞ വര്‍ഷം ഇതേ കാലയളവില്‍ 106.8 ബില്യന്‍ റിയാല്‍ വിദേശ രാജ്യങ്ങളിലേക്ക് അയച്ചിരുന്ന വിദേശികള്‍ ഈ വര്‍ഷം ഇതേ കാലയളവില്‍ അയച്ചത്. 102.3 ബില്യന്‍ റിയാല്‍ മാത്രമാണ്.  4.2 ശതമാനത്തിന്റെ കുറവ്.
കഴിഞ്ഞ 12 വര്‍ഷത്തിനിടെ ആദ്യമായാണ് ഇത്രയും കുറവ് രേഖപ്പെടുത്തുന്നതെന്നും സഊദി ബാങ്കിങ് മേഖലയിലെ ഉദ്യോഗസ്ഥര്‍ അഭിപ്രായപ്പെട്ടു.
2003ല്‍ 38.1 ബില്യന്‍ റിയാല്‍ അയച്ചിരുന്ന വിദേശികള്‍ തൊട്ടടുത്ത വര്‍ഷം 36.1 ബില്യന്‍ റിയാലായിരുന്നു നാട്ടിലേക്ക് അയച്ചത്. ഏതാണ്ട് രണ്ടു ബില്യന്‍ റിയാലിന്റെ കുറവ് 2004ല്‍ അനുഭവപ്പെട്ടു. അതിന് ശേഷം വിദേശത്തേക്കുള്ള പണമയക്കുന്നത് മാസം തോറും വര്‍ധിക്കുന്നതായാണ് കണ്ടിരുന്നത്.  ഇത് വര്‍ധിക്കുകകയല്ലാതെ ഇതുവരെ കുറഞ്ഞിരുന്നില്ല.
 സ്വദേശിവ്തക്കരണത്തിന്റെ പേരില്‍ ചില കമ്പനികള്‍ പ്രതിസന്ധിയിലായതും വിദേശികള്‍ക്ക് വിനയായി.   പ്രത്യേകിച്ച് നിര്‍മാണ മേഖലയില്‍ പ്രവര്‍ത്തിക്കുന്ന കമ്പനികള്‍ക്കാണ് പ്രതിസന്ധി നേരിട്ടത്.
പെട്രോള്‍ വിലയിടവിനെ തുടര്‍ന്ന് സഊദി ഗവണ്‍മെന്റ് ചെലവു ചുരുക്കല്‍ നടപടി സ്വീകരിച്ചതിനാല്‍ നിരവധി വിദേശ തൊഴിലാളികളുടെ തൊഴില്‍ കരാര്‍ അവസാനിപ്പിക്കാന്‍ കമ്പനികള്‍ നിര്‍ബന്ധിതരായിട്ടുണ്ട്.
 തൊഴില്‍ സാമൂഹിക വികസന മന്ത്രാലയം പുറത്തുവിട്ട റിപ്പോര്‍ട്ട് പ്രകാരം സഊദിയില്‍ 90 ലക്ഷത്തിലേറെ വിദേശ തൊഴിലാളികളുണ്ട്. വിദേശികളുടെ പരിചയ സമ്പത്ത് തുടര്‍ന്നും ആവശ്യമുള്ള ചില മേഖലകളുണ്ടെന്നതിനാല്‍ വിദേശ തൊഴിലാളികളുടെ എണ്ണം കുറക്കുകയില്ലെന്നും മന്ത്രാലയം വ്യക്തമാക്കി.