ന്യൂയോര്‍ക്ക്: യു.എസ് പ്രസിഡന്റ് തെരഞ്ഞെടുപ്പില്‍ ഉന്നയിക്കാത്ത വിഷയങ്ങള്‍ ഉയര്‍ത്തി യു.എസ് വൈസ് പ്രസിഡന്റ് സ്ഥാനാര്‍ഥികളുടെ സംവാദം (ഡിബേറ്റ്) ശ്രദ്ധേയമായി. സിറിയ, ദേശസുരക്ഷാ വിഷയങ്ങളിലാണ് ഇരു സ്ഥാനാര്‍ഥികളും തമ്മില്‍ വാഗ്വാദം നടന്നത്. പ്രസിഡന്റ് സ്ഥാനാര്‍ഥി സംവാദത്തില്‍ പരാജയപ്പെട്ട റിപ്പബ്ലിക്കന്‍ പാര്‍ട്ടിയുടെ ഡൊണാള്‍ഡ് ട്രംപിനുണ്ടായ നാണക്കേട് മറികടക്കാന്‍ വൈസ് പ്രസിഡന്റ് സ്ഥാനാര്‍ഥി മൈക്ക് പെന്‍സ് നടത്തിയ ശ്രമം വിജയം കണ്ടു. ട്രംപിനെതിരേ ഉയര്‍ന്ന ആരോപണങ്ങള്‍ പ്രതിരോധിക്കാനായില്ലെന്നും മൈക്ക് പെന്‍സിന്റെ പ്രകടനത്തില്‍ പ്രേക്ഷകര്‍ സംതൃപ്തി രേഖപ്പെടുത്തുകയും ഓണ്‍ലൈന്‍ വോട്ടെടുപ്പില്‍ അദ്ദേഹം വിജയിക്കുകയും ചെയ്തു.
പൊതുവെ അമേരിക്കന്‍ വൈസ് പ്രസിഡന്റ് സ്ഥാനാര്‍ഥികളുടെ സംവാദം വലിയതോതില്‍ ചര്‍ച്ചയാകാറില്ല. പ്രസിഡന്റ് സ്ഥാനാര്‍ഥികളായ ഡൊണാള്‍ഡ് ട്രംപും ഹിലരി ക്ലിന്റനും തമ്മില്‍ നടത്തിയ സംവാദത്തില്‍ പരാമര്‍ശിക്കാത്ത വിഷയങ്ങളായ സിറിയയും അഭയാര്‍ഥി പ്രശ്‌നങ്ങളും ഹിലരി ഫൗണ്ടേഷന്റെ അഴിമതിയുമാണ് വൈസ് പ്രസിഡന്റ് സ്ഥാനാര്‍ഥികളുടെ സംവാദത്തില്‍ ചര്‍ച്ചയായത്.
വൈസ് പ്രസിഡന്റ് സ്ഥാനത്തേക്ക് ഹിലരി ക്ലിന്റന്റെ ഡെമോക്രാറ്റിക് പാര്‍ട്ടി സ്ഥാനാര്‍ഥി ടീംകെയിനും ട്രംപിന്റെ റിപ്പബ്ലിക്കന്‍ പാര്‍ട്ടി സ്ഥാനാര്‍ഥി മൈക്ക് പെന്‍സുമാണ് സംവാദത്തില്‍ ഏറ്റുമുട്ടിയത്. ട്രംപ് അമേരിക്ക വിഭജിക്കുമെന്ന മുന്നറിയിപ്പുപോലും ഹിലരി ഉന്നയിച്ചിരുന്നു. ഇന്ത്യാന ഗവര്‍ണറായ പെന്‍സിന് നന്നായി ഗൃഹപാഠം ചെയ്യാനായെങ്കിലും സിറിയയും അഭയാര്‍ഥി പ്രശ്‌നങ്ങളും സംബന്ധിച്ച് അദ്ദേഹം നടത്തിയ വിവാദ പ്രസ്താവനകള്‍ സംവാദത്തെ തീക്ഷണമാക്കി.
സംവാദത്തില്‍ കെയിനിന് പറ്റിയ തെറ്റുകള്‍ ഹിലരിയുടെ പ്രചാരണത്തിന് തടസമാകില്ലെങ്കിലും അടുത്ത പ്രസിഡന്റ് സ്ഥാനാര്‍ഥികളുടെ സംവാദത്തിനുള്ള ചൂണ്ടുപലകയാണെന്നും വിലയിരുത്തുന്നു. അടുത്ത ഞായറാഴ്ച സെന്റ് ലൂയിസിലാണ് പ്രസിഡന്റ് സ്ഥാനാര്‍ഥികളുടെ അടുത്ത സംവാദം നടക്കുന്നത്.