കൊച്ചി: ഈ സീസണിലെ കേരളത്തിന്റെ രഞ്ജി മത്സരങ്ങള്‍ക്ക് ഇന്നു തുടക്കം. ഇന്നു പശ്ചിമ ബംഗാളിലെ ബംഗാള്‍ ക്രിക്കറ്റ് അക്കാദമി ഗ്രൗണ്ടില്‍ നടക്കുന്ന മത്സരത്തില്‍ കേരളം, ജമ്മു-കശ്മിരിനെ നേരിടും. ഹൈദരാബാദ്, ഹരിയാന, ഹിമാചല്‍പ്രദേശ്, ത്രിപുര, സര്‍വിസസ്, ഗോവ, ആന്ധ്ര, ചത്തീസ്ഗഢ് എന്നിവര്‍ ഉള്‍പ്പെട്ട ഗ്രൂപ്പ് സിയിലാണ് കേരളം.
ഈ മാസം 13നു കേരളം ഹിമാചല്‍ പ്രദേശുമായി 20നു ഹൈദരാബാദുമായും 27നു ചത്തീസ്ഗഢുമായും ഏറ്റുമുട്ടും. നവംബര്‍ അഞ്ചിനു ഹരിയാനക്കെതിരേയും 13നു ഗോവയുമായും  21നു ആന്ധ്രയുമായും 29നു ത്രിപുരയുമായും കേരളം മത്സരിക്കും. ഡിസംബര്‍ ഏഴിനു ഗ്രൂപ്പിലെ അവസാന പോരാട്ടത്തില്‍ സര്‍വിസസാണ് കേരളത്തിന്റെ എതിരാളികള്‍.
ടൂര്‍ണമെന്റിനുള്ള 15 അംഗ ടീമിനെ രോഹന്‍ പ്രേമാണ് നയിക്കുന്നത്. സച്ചിന്‍ ബേബിയാണ് വൈസ് ക്യാപ്റ്റന്‍. നിഖിലേഷ് സുരേന്ദ്രന്‍, സിന്ദീപ് വാര്യര്‍, വി.എ ജഗദീഷ്, ബേസില്‍ തമ്പി, ഭവിന്‍ തക്കര്‍, മനു കൃഷ്ണന്‍, ജലജ് സക്‌സേന, റോബര്‍ട്ട് ഫെര്‍ണാണ്ടസ്, സഞ്ജു സാംസണ്‍, നിധീഷ്, മോനിഷ്, വിനോദ് കുമാര്‍, ഇഖ്ബാല്‍ അബ്ദുല്ല എന്നിവരാണ് മറ്റു ടീമംഗങ്ങള്‍.

വനിതാ ക്രിക്കറ്റ്: കേരളത്തിനു ജയം

ചെന്നൈ: സീനിയര്‍ വനിതാ ഏകദിന ടൂര്‍ണമെന്റില്‍ കേരളം, ജമ്മു- കശ്മിരിനെ എഴു വിക്കറ്റിനു തോല്‍പ്പിച്ചു. ചെന്നൈ മുരുഗപ്പ ടി.ഐ സൈക്കിള്‍സ് ഗ്രൗണ്ടില്‍ നടന്ന മത്സരത്തില്‍ ജമ്മു-കശ്മിര്‍ ഉയര്‍ത്തിയ 78 റണ്‍സിന്റെ വെല്ലുവിളി കേരളം മൂന്നു വിക്കറ്റു നഷ്ടത്തില്‍ മറികടന്നു. കേരളത്തിനായി ടി ഷാനി 28ഉം ജിന്‍സി ജോര്‍ജ് 24ഉം റണ്‍സെടുത്തു. ടോസ് നേടി ബാറ്റിങ് തിരഞ്ഞെടുത്ത കശ്മിരിന്റെ ഒന്‍പത് താരങ്ങള്‍ രണ്ടക്കം കാണാതെ പുറത്തായി. കേരളത്തിനായി സജന നാലു വിക്കറ്റും മിന്നു മണി മൂന്നു വിക്കറ്റും വീഴ്ത്തി.