അങ്കമാലി: പുലര്‍ച്ചെ എത്തി അങ്കമാലി നഗരത്തെ വൃത്തിയാക്കുന്ന ശുചീകരണ തൊഴിലാളികള്‍ക്ക് വിദ്യാര്‍ഥികളുടെ ആദരം. അങ്കമാലി വിശ്വജ്യോതി സ്‌കൂള്‍ വിദ്യാര്‍ഥികളാണ് അങ്കമാലി നഗരസഭയിലെ 39 ശുചീകരണ തൊഴിലാളികളെ ആദരിച്ചത്. എല്ലാ തൊഴിലും മാന്യത അര്‍ഹിക്കുന്നു എന്ന സന്ദേശവും കുട്ടികള്‍ ശുചീകരണ തൊഴിലാളികളെ ആദരിച്ചതിലൂടെ സമൂഹത്തിന് പകര്‍ന്നു. കുട്ടികളില്‍ നിന്നും ആദ്യമായി കിട്ടിയ അംഗീകാരം ഏറെ സന്തോഷത്തോടെയാണ് തൊഴിലാളികള്‍ ഏറ്റുവാങ്ങിയത്.
വ്യവസായ നഗരമായ കൊച്ചിയുടെ കവാടമാണ് അങ്കമാലി. അതുകൊണ്ടുതന്നെ കൊച്ചിയിലേയ്‌ക്കെത്തുന്നവരെ വൃത്തിയോടെ വേണം സ്വീകരിക്കാന്‍.
ഇതുംകൂടി കണക്കിലെടുത്താണ് അങ്കമാലിയെ വൃത്തിയാക്കി സൂക്ഷിക്കുന്ന തൊഴിലാളികളെ കുട്ടികള്‍ ആദരിച്ചത്. മാലിന്യം റോഡിലേയ്ക്ക് വലിച്ചെറിയരുതെന്ന പാഠവും പകരുന്ന വേദിയായി മാറി വിശ്വജ്യോതി സ്‌കൂളില്‍ സംഘടിപ്പിച്ച ആദരിക്കല്‍ ചടങ്ങ്. സ്‌കൂള്‍ മാനേജര്‍ ഫാ.ജോസ് പടയാട്ടി തൊഴിലാളികള്‍ക്ക് സ്‌നേഹോപഹാരം നല്‍കി.
നഗരസഭ ചെയര്‍പേഴ്‌സണ്‍ എം.എ ഗ്രേസി മുഖ്യാതിഥിയായിരുന്നു.
അങ്കമാലി സെന്റ് ജോര്‍ജ്ജ് ബസലിക്ക റെക്ടര്‍ ഫാ. ഡോ.കുര്യാക്കോസ് മുണ്ടാന്‍ മുഖ്യപ്രഭാഷണം നടത്തി. സ്‌കൂള്‍ പ്രിന്‍സിപ്പല്‍ ഫാ.മാര്‍ട്ടിന്‍ മുണ്ടാടന്‍, വൈസ് പ്രിന്‍സിപ്പല്‍ ഫാ.ജോഷി കൂട്ടുങ്കല്‍, വാര്‍ഡ് കൗണ്‍സിലര്‍മാരായ ബിനി.ബി.നായര്‍, ലേഖ മധു, അങ്കമാലി മര്‍ച്ചന്റ്‌സ് അസോസിയേഷന്‍ പ്രസിഡന്റ് സാജു ചാക്കോ, പി.ടി.എ പ്രസിഡന്റ് ഇ.പി ജയചന്ദ്രന്‍, അധ്യാപിക കെ ജയശ്രീ എന്നിവര്‍ പ്രസംഗിച്ചു. വിദ്യാര്‍ഥികളുടെ കലാപരിപാടികളും ഉണ്ടായിരുന്നു.